އެމެރިކާގެ ކުރީގެ ރައީސް ޖޯން އެފް ކެނެޑީ "ޖޭއެފްކޭ" އަށް ބޮޑުބޭބެ ކިޔާ ބޭފުޅަކު އަންނަ އަހަރުގެ ރިޔާސީ އިންތިހާބުގައި ވާދަކުރަން ކެމްޕެއިން ފައްޓަވައިފި އެވެ.
ވެކްސިންއާ ދެކޮޅު އެކްޓިވިސްޓެއްގެ ގޮތުގައި މަގްބޫލް، އުމުރުން 69 އަހަރުގެ ރޮބަޓް އެފް ކެނެޑީ ޖޫނިއާ ވާދަކުރައްވާނީ މިހާރު ވެރިކަމުގައި އޮތް ޑިމޮކްރެޓިކް ޕާޓީގެ ޓިކެޓަށެވެ.
މިހާރުގެ ރައީސް ޖޯ ބައިޑެން ވެސް ވަނީ ދެ ވަނަ ދައުރަކަށް ޝައުގުވެރިކަން ފާޅުކުރައްވައިފަ އެވެ. އެހެން ނަމަވެސް މިހާތަނަށް ރަސްމީކޮށް އިއުލާން ކުރައްވާފައެއް ނުވެ އެވެ.
ރޮބަޓް އެފް ކެނެޑީ ޖޫނިއާގެ ބައްޕާފުޅު "އާރްއެފްކޭ" އަކީ ކެނެޑީގެ ސަރުކާރުގައި އެޓާނީ ޖެނެރަލްކަން ކުރެއްވި ބޭފުޅެކެވެ. އޭގެ ފަހުން ނިއު ޔޯކް ސެނެޓް މެމްބަރުކަން ވެސް ކުރެއްވި އެވެ.
ރައީސްގެ މަގާމުގައި ހުއްޓައި ޖޭއެފްކޭ އަވަހާރަކޮށްލީ 1963 ގަ އެވެ. އޭގެ ފަހުން 1968 ގައި އާރްއެފްކޭ ވެސް އަވަހާރަކޮށްލީ ރައީސް ކަމަށް ކެމްޕެއިން ކުރައްވަނިކޮށެވެ.
އާރްއެފްކޭ ޖޫނިއާއަކީ ކުރިން ތިމާވެށީގެ ވަކީލެކެވެ. އެހެން ނަމަވެސް 2005 ވަނަ އަހަރުގެ ފަހުން އޭނާ އުޅުއްވަނީ ވެކްސިނާ ދެކޮޅު އެކްޓިވިސްޓެއްގެ ގޮތުގަ އެވެ.
މަސަޗުސަޓްސް ސްޓޭޓްގައި އޮތް އެއްވުމެއްގައި ކެމްޕެއިން ފައްޓަވަމުން އޭނާ ވައުދުވީ އެމެރިކާގެ ސިޔާސީ ބައިބައިވުން ނައްތާލައި ރައްޔިތުންނަށް ތެދު ހާމަކުރުމަށެވެ.
