ރިސޯޓު ތަރައްގީކުރަން ސަރުކާރާއި އަމިއްލަ ފަރާތްތަކާ ގުޅިގެން ހަދާފައިވާ ތިން ޖޮއިންޓް ވެންޗާ (ޖޭވީ) އެއްގައި އޮތް ސަރުކާރުގެ ހިއްސާ ވިއްކާލުމަށް ޓަކައި އެ ހިއްސާތައް އަގު ކުރާނެ ބަޔަކު ހޯދަން އިއުލާން ކޮށްފި އެވެ.
މި ޖޭވީ ކުންފުނިތަކަކީ ޓޫރިޒަމް ގާނޫނުގެ ފަސްވަނަ މާއްދާގައި ބުނާ ގިނަ ބަޔަކު ބައިވެރިވާ ބީލަން މަރުހަލާއަށް ނުގޮސް ރަށްތައް ކުއްޔަށް ދޭން ހަދާފައިވާ ކުންފުނިތަކެވެެ. ޓޫރިޒަމް ވިޔަފާރިތަކަށާއި ޓޫރިޒަމް ދާއިރާއަށް އަންނަ އިންވެސްޓްމަންޓުތަކަށް ފަހިކޮށްދިނުމުގެ މަގުސަދުގައި ކަމަށް ބުނެ އެކި ސަރުކާރުތަކުން މިގޮތަށް ކުންފުނި ހަދައިގެން ރަށްތައް ކުއްޔަށް ދީފައިވެ އެވެ.
މިފަދަ 45 ކުންފުންޏެއް އޮތް ކަމަށް ސަރުކާރުން މީގެކުރިން ހާމަކޮށްފައިވާއިރު މި ކުންފުނިތަކުގައި ސަރުކާރުގެ ހިއްސާ އޮވެގެންވާ ފައިދާއަށް ވުރެ ކުރިމަތިވާ ހުރަސްތައް ގިނަ ކަމަށް ފިނޭންސް މިނިސްޓްރީން ބުނެފައިވެ އެވެ.
އެއާއެކު ޓޫރިޒަމް ގާނޫނު އިސްލާހުކޮށް މިފަދަ ޖޭވީތަކުގައި އޮންނަ ސަރުކާރުގެ ހިއްސާ ވަކި އުސޫލުތަކެއް ދަށުން ވިއްކާލެވޭނެ މަގު ވަނީ ފަހިކޮށްފަ އެވެ.
ފިނޭންސް މިނިސްޓްރީން ތިން ޖޭވީއެއްގެ ހިއްސާ އަގުކޮށްދޭނެ ބަޔަކު ހޯދަން ވަނީ އިއްޔެ އިއުލާނުކޮށްފަ އެވެ.
- ހުރަސްފަރު ހޯލްޑިންގްސް ޕްރައިވެޓް ލިމިޓެޑް
- ނާއިންފަރު ހޯލްޑިންގްސް ޕްރައިވެޓް ލިމިޓެޑް
- ބޮޑުމޮހޮރާ އިންވެސްޓްމަންޓްސް ޕްރައިވެޓް ލިމިޓެޑް
ބޮޑުމޮހޮރާގައި ސަރުކާރުގެ 10 ޕަސަންޓު ހިއްސާ އޮތް އިރު، ހުރަސްފަރާއި ނާއިފަރުގައި ސަރުކާރުގެ ފަސް ޕަސަންޓު ހިއްސާ އޮވެ އެވެ.
ދާދިފަހުން އެކުލަވައިލި ގަވައިދުގެ ދަށުން، ހިއްސާ ވިއްކާލުމުގެ ކުރިން ހިއްސާގެ އެންމެ ދަށް އަގު ކަނޑައަޅަން ޖެހެނީ އެ ކުންފުންޏެއްގެ ދަށުގައި ހުރި ހުރިހާ ހަރު މުދަލަކާއި، ރަށް ނުތަވަ ފަޅު ހިމެނޭ ގޮތުން، މުސްތަގިއްލު ވެލިއުއާއެއް މެދުވެރިކޮށް ހަދާ ވެލުއޭޝަނަކުންނެވެ.
އެ އަގުގެ ތެރޭގައި ޖޭވީއަށް ދޫކޮށްފައިވާ ފަޅު، ރަށް ނުވަތަ ބިމުގެ އެކިއުޒިޝަން ފީ އާއި ބިމު ކުލީގެ ގޮތުގައި ދައްކަން ޖެހޭ މިންވަރާއި، އިންވެސްޓްމަންޓު ވެލިއު އަދި ހިއްސާ ވިއްކާލުމުން ކުރިއަށް އޮތް ފަސް އަހަރުގެ ތެރޭގައި ސަރުކާރަށް ލިބިދާނެ ކަމަށް ލަފާކުރެވޭ އާމްދަނީ އާއި އޮޕޮޗުނިޓީ ކޯސްޓަށް ރިއާޔަތްކުރަން ޖެހޭ ކަމަށް ބަޔާންކޮށްފައިވެ އެވެ.
