ހޮނިހިރު ދުވަހު އެމެރިކާގެ އަލަބާމާ ސްޓޭޓުގައި ބަޑި ޖަހައި ހަތަރު މީހުން މަރާލައިފި އެވެ.
ރިޕޯޓުތައް ބުނާ ގޮތުން ބަޑި ޖެހީ ޑޭޑްވިލް އަވަށުގައި ކުއްޖެއްގެ 16 ވަނަ އުފަން ދުވަސް ފާހަގަކުރަން ބޭއްވި ޕާޓީގެ ތެރެއިންނެވެ. އެ ހާދިސާގައި ބައެއް މީހުންނަށް އަނިޔާވި އެވެ.
އެ ހާދިސާ ހިނގީ ހޮނިހިރު ދުވަހުގެ ރޭ 10:30 ގައި މެހޮގަނީ މާސްޓާޕީސް ޑާންސް ސްޓޫޑިއޯގަ އެވެ. އަލަބާމާގެ ގަވަރުނަތި ކޭ އައިވީ ވަނީ އެކަމާ ގުޅިގެން ހިތާމަ ފާޅުކުރައްވައިފަ އެވެ.
"ބޮޑެތި އަނިޔާވެރި ކުށްތަކަށް މި ސްޓޭޓުގައި ޖާގައެއް ނޯންނާނެ،" ގަވަރުނަރު ކުރެއްވި ޓްވީޓެއްގައި ވިދާޅުވި އެވެ.
ގަވަރުނަރު އައިވީއަކީ ބަޑި ގެންގުޅުމުގެ ހައްގު އޮންނަން ޖެހޭނެ ކަމަށް ވަކާލާތު ކުރައްވާ ބޭފުޅެކެވެ. އަލަބާމާ ސްޓޭޓުގެ އާއްމު ތަންތަނުގައި ފޮރުވައިގެން ބަޑި ގެންގުޅުމަށް ހުއްދަ ބޭނުންވާނެ ކަމަށް އޮތް އޮތުން ބާތިލުކޮށް، މިދިޔަ އަހަރު ގާނޫނެއްގައި ވެސް އޭނާ ސޮއިކުރެއްވި އެވެ.
ގަވަރުނަރުކަން ހޯދަން 2022 ވަނަ އަހަރު އައިވީ ކުރެއްވި ކެމްޕެއިނަށް ވެސް އެންމެ ބޮޑަށް އެހީތެރިވެދިނީ އެމެރިކާގެ ގައުމީ ރައިފަލް ޖަމިއްޔާއިންނެވެ.
ހޮނިހިރު ދުވަހު ބަޑި ޖެހީ ކީއްވެގެން ކަމެއް އަދި މިހާތަނަށް މީހަކު ހައްޔަރުކޮށްފައިވާ ކަމެއް ވެސް ސާފެއް ނޫނެވެ.
އަލަބާމާގެ އިތުރުން ހޮނިހިރު ދުވަހު ކެންޓަކީ ސްޓޭޓުގެ ލުއީވިލްގައި ވެސް ބަޑި ޖެހި އެވެ. އެ ހާދިސާގައި ދެ މީހުން މަރުވެ ހަތަރު މީހުންނަށް އަނިޔާވި އެވެ.
ތަފާސްހިސާބުތައް ދައްކާ ގޮތުން މި އަހަރުގެ މިހާތަނަށް އެމެރިކާގައި މިގޮތަށް ބަޑި ޖެހުމުގެ 140 ހާދިސާ ރިޕޯޓުކޮށްފައިވެ އެވެ.
