އެމެރިކާގެ ސިއްރު ދިފާއީ އަދި ޖާސޫސީ ލިޔުންތައް ލީކްކުރި ކަމަށް ތުހުމަތުވާ މީހާ ހައްޔަރުކޮށްފި އެވެ.
އެފްބީއައި އިން ނެރުނު ބަޔާނެއްގައި ބުނެފައި ވަނީ މި މައްސަލަގައި ހައްޔަރު ކުރީ މަސަޗޫސަޓްސް އެއާ ނޭޝަނަލް ގާޑްގެ ޖާސޫސީ ގޮފީގެ މެމްބަރެއް ކަމަށްވާ 21 އަހަރުގެ ޖެކް ޓެޝެއިރާ ބުރާސްފަތި ދުވަހުގެ މެންދުރު ފަހު ހައްޔަރުކުރީ އޭނާގެ ގެއިން ކަމަށެވެ.
ހައްޔަރުކުރުމުގެ ކުރިން އޭނާގެ ނަން ވަނީ މީޑިއާތަކުގައި އާންމުވެފަ އެވެ.
ޓެޝެއިރާގެ މައްޗަށް ތުހުމަތު ކުރަނީ ސިއްރު ދިފާއީ އަދި ޖާސޫސީ ލިޔުންތައް ނައްތާލުމާއި ހިފެހެއްޓުމާއި ޓްރާންސްމިޓްކުރުމެވެ. އެއީ އެމެރިކާގެ ގާނޫނުގެ ދަށުން 10 އަހަރުގެ ޖަލު ހުކުމެއް އަންނާނެ އަދަބެކެވެ.
އެމެރިކާގެ ސިއްރު ދިފާއީ އަދި ޖާސޫސީ ލިޔުންތައް ލީކްކުރި ކަމަށް ތުހުމަތުވާ މީހާ، ޖެކް ޓެޝެއިރާ ހައްޔަރުކޮށްގެން ގެންދަނީ.
ޓެޝެއިރާ އެ ލިޔުންތައް ލީކުކޮށްލޯ އޮންލައިން ގޭމިން ޗެޓް ގްރޫޕެއްގަ އެވެ. ނިއު ޔޯކް ޓައިމްސް ނޫހުން ބުނީ އެ ގްރޫޕްގެ ލީޑަރުގެ ނަމަކީ ވެސް ޖެކް ޓެޝެއިރާ ކަމަށެވެ.
ގޭމް ކުޅޭ މީހުންގެ މެދުގައި މަގްބޫލް ސޯޝަލް މީޑިއާ ޕްލެޓްފޯމް ޑިސްކޯޑްގައި 100 އަށް ވުރެ ގިނަ ސިއްރު ލިޔުން ލީކްކުރި ކަމަށް ބެލެވެ އެވެ.
އޭގެ ތެރޭގައި ޔޫކްރެއިން ހަނގުރާމައާ ގުޅޭ ޖާސޫސީ ކަންކަން ހިމެނޭ ލިޔުންތަކާއި އެމެރިކާއާ ގާތް ގައުމުތަކާއި އެހެން ގައުމުތަކާ ގުޅޭ މައުލޫމާތު ހިމެނޭ ލިޔުންތައް ވެސް ހިމެނެ އެވެ.
ލިޔުންތައް ލީކުކުރި ގްރޫޕްގެ މެމްބަރުންގެ ތެރޭގައި ރަޝިއާ އާއި ޔޫކްރެއިން އަދި ޔޫރަޕާއި، އޭޝިއާ އަދި ދެކުނު އެމެރިކާގެ ގައުމުތަކުގެ މެމްބަރުން ހިމެނެ އެވެ.
އެ ލިޔުންތަކުގެ ވާހަކަ ގްރޫޕުން އެންމެ ފުރަތަމަ ބޭރު ނުވި ނަމަވެސް، މާޗް މަހުގެ ކުރީކޮޅު ޑިސްކޯޑްގެ އެހެން ސާވާތަކުގައި ލިޔުންތައް ޕޯސްޓުކުރަން ފެށި އެވެ. އޭގެ ފަހުން ޓެލެގްރާމް އާއި އެހެން ބައެއް އެޕްތަކަށް ވެސް އެ ލިޔުންތައް އާއްމުވި އެވެ.
