ޑޮކްޓަރީ ބޭހާއި މެޑިކަލް ކޮންސިއުމަބްލްސް އެއްފަހަރާ ގަނޑުކޮށް، ބަލްކް ޕްރޮކިއުމެންޓްގެ ތެރެއިން ގަތުމަށް ބޭރުގެ ފަރާތަކާ މަޝްވަރާ ކުރެވި، އެއްބަސްވުމަކާ ހަމައަށް އާދެވިފައިވާ ކަމަށް ފިނޭންސް މިނިސްޓްރީން ބުނެފި އެވެ.
ދައުލަތުގެ ރިކަރަންޓު ހަރަދު އާމްދަނީން ފޫބެއްދޭނެ ގޮތަށް މި އަހަރުގެ ބަޖެޓު ފަރުމާކޮށްފައިވާއިރު، ހަރަދު ކުޑަކުރުމުގެ ފިޔަވަޅުތަކުން ގާތްގަނޑަކަށް ތިން ބިލިއަން ރުފިޔާ ސަލާމަތް ކުރަން ވަނީ ހިމަނާފަ އެވެ.
އޭގެ ތެރޭގައި ބަލްކް ޕްރޮކިއުމެންޓްގެ ތެރެއިން ޑޮކްޓަރީ ބޭހާއި މެޑިކަލް ކޮންސިއުމަބްލްސް ގަނެގެން އެކަމަށް ކުރާ ހޭދައިން 166.41 މިލިއަން ރުފިޔާ ސަލާމަތް ކުރޭވޭނެ ކަމަށް ފިނޭންސުން ވަނީ އަންދާޒާކޮށްފަ އެވެ.
އެކަން މިދިޔަ ޖެނުއަރީ މަހުގެ ތެރޭގައި ކުރެވޭނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެފައިވީ ނަމަވެސް، މި އަހަރުގެ މިހާތަނަށް އެކަން އޮތީ ނުނިމި އެވެ.
އެކަމާ ގުޅޭގޮތުން، "އަދަދު"އިން ކުރި ސުވާލަކަށް ޖަވާބު ދެއްވަމުން ފިނޭންސް މިނިސްޓްރީގެ ޗީފް ފައިނޭންޝަލް ބަޖެޓް އެގްޒެކެޓިވް އަހުމަދު ސަރުވަޝް އާދަމް ވިދާޅުވީ ބަލްކް ޕްރޮކިޔުމަންޓުގެ މަސައްކަތް ގާތްގަނޑަކަށް ނިމި ބޭރު ފަރާތަކާއެކު އެއްބަސްވުމަކާ ހަމައަށް އާދެވިފައިވާ ކަމަށެވެ.
"އެއްބަސްވުމުގައި ސޮއި ކުރެވޭ ހިސާބަށް މިހާރު އާދެވިއްޖެ. ވަރަށް އަވަހަށް އެކަން ނިންމައި އެކަމުގެ ތަފްސީލުތައް ހާމަކުރާނެ،" ސަރުވަޝް ވިދާޅުވި އެވެ.
