އެއްބަސްވުމާ ހިލާފުވިކަމަށް ވިދާޅުވެ ކުރީގެ ގާނޫނީ ވަކީލާ ދެކޮޅަށް 500 މިލިއަން ޑޮލަރު ހޯދަން އެމެރިކާގެ ކުރީގެ ރައީސް ޑޮނަލްޑް ޓްރަމްޕް ނިންމަވައިފި އެވެ.
ޓްރަމްޕް ތުހުމަތު ކުރައްވާ ގޮތުގައި މައިކަލް ކޯހެން އެމަނިކުފާނުގެ ގާނޫނީ ވަކީލަކަށް ހުންނެވި އިރު، ކްލަޔަންޓުގެ މަސްލަހަތު އިސްކުރުމުގައި ވަކީލުގެ މައްޗަށް އޮންނަ ޒިންމާ އަދާކުރުމުގައި ފެއިލްވި ކަމަށެވެ.
ޓްރަމްޕްއާ ދެކޮޅަށް ނިއު ޔޯކްގައި ހިންގި ޖިނާއީ ތަހުގީގުގެ އެންމެ މުހިއްމު އެއް ހެކިވެރިޔަކީ ކޯހެން އެވެ. އެހެންވެ، ޓްރަމްޕްގެ ސަޕޯޓަރުން ގެންދަނީ ކޯހެންއާ މެދު ހިތްހަމަނުޖެހުން ފާޅުކުރަމުންނެވެ.
މިދިޔަ ހަފުތާގައި ނިއު ޔޯކްގެ ކޯޓެއްގައި ވަނީ ޓްރަމްޕްގެ މައްޗަށް މަކަރާއި ހީލަތް ހެދުމުގެ ދައުވާ އުފުލައިފަ އެވެ. އެއީ ބަރަހަނާ ފިލްމު ކުޅޭ އަންހެނަކާ އެކު ޓްރަމްޕް ބޭއްވި ގުޅުން ފޮރުވަން ފައިސާ ދިން ކަމަށް ބުނާ މައްސަލައިގަ އެވެ.
ފައިސާ ދިން ކަމަށް ބުނާ ދުވަސްވަރު ޓްރަމްޕްގެ ވަކީލަކީ ކޯހެން އެވެ. ޓްރަމްޕްގެ ވަކީލެއްގެ ގޮތުގައި 10 އަހަރަށް ވުރެ ދިގު މުއްދަތެއް ހޭދަކުރި ކޯހެން ވަނީ ޓްރަމްޕް އޯގަނައިޒޭޝަންގެ ނައިބު ރައީސްކަން ވެސް އަދާކޮށްފަ އެވެ.
އެކަމަކު 2016 ވަނަ އަހަރުގެ ރިޔާސީ އިންތިހާބަށް ފަހު ޓްރަމްޕާއި ކޯހެންއާ ދެމެދު މައްސަލަ ޖެހުނެވެ. އޭރު އިދާރާތަކުން ދިޔައީ ޓްރަމްޕްއާ ގުޅުން ހުރި ފަރާތްތައް ތަހުގީގު ކުރަމުންނެވެ.
މަކަރާ ހީލަތް ހެދުމާއި ކެމްޕޭނަށް ހަރަދު ކުރުމުގައި ގަވާއިދާ ހިލާފުވި ކަމަށް އެއްބަސްވެ، 2018 ވަނަ އަހަރު ކޯހެން ތިން އަހަރަށް ޖަލަށް ހުކުމްކޮށް ޖޫރިމަނާ ކުރި އެވެ.
މިހާރު މިނިވަންވެފައިވާ ކޯހެންއަކީ ޓްރަމްޕަށް އެންމެ ގިނައިން ފާޑުކިޔާ އެކަކެވެ. ގިނަ ޓީވީ ޝޯތަކަށް އޭނާ އަރަމުންދާ އިރު، ފޮތެއް ލިޔެ ޕޮޑްކާސްޓެއް ވެސް ހުށަހަޅަމުން ދެ އެވެ.
