އެމެރިކާގެ ކެންޓަކީ ސްޓޭޓުގެ ލުއީވިލް ސިޓީގެ ބޭންކެއްގެ މުވައްޒަފަކު، އެ ބޭންކަށް އަމާޒުކޮށް ބަޑި ޖެހުމުން ފަސް މީހުން މަރުވެއްޖެ އެވެ.
ފުލުހުން ބުނީ މަރުވީ ބޭންކުގެ މުވައްޒަފުން ކަމަށެވެ. އެއީ އުމުރުން 40 އަހަރާއި 64 އަހަރާ ދެމެދުގެ މީހުންނެވެ. އަނިޔާވި ނުވަ މީހުންގެ ތެރޭގައި ފުލުހަކު ހިމެނެ އެވެ.
ހަމަލާ ދިން މީހާ ވަނީ އިންސްޓަގްރާމް މެދުވެރިކޮށް އެ ހާދިސާ ލައިވް ސްޓްރީމްކޮށްފަ އެވެ. އެކަން ރިޕޯޓުކުރިތާ ތިން މިނެޓު ތެރޭ ފުލުހުން އޯލްޑް ނޭޝަނަލް ބޭންކަށް ހާޒިރުވި އެވެ.
ހަމަލާ ހުއްޓުވަން ފުލުހުން ވެސް ބަޑިޖެހި އެވެ. އެއާއެކު އުމުރުން 25 އަހަރުގެ ކޮނޯ ސްޓާޖަން ވެސް މަރުވެފައިވާ ކަމަށް ފުލުހުން ބުންޏެވެ.
ލުއީވިލްގެ މޭޔަރު ކްރެއިގް ގްރީންބާގް ވިދާޅުވީ "އެއީ ބަޔަކަށް ޓާގެޓުކޮށްގެން ދިން އަނިޔާވެރި ހަމަލާއެއް" ކަމަށެވެ. ހަމަލާ ލައިވް ސްޓްރީމް ކުރަން ފެށިތާ ކުޑައިރުކޮޅެއްގެ ތެރޭގައި ރިމޫވްކުރި ކަމަށް އިންސްޓަގްރާމް ހިންގާ މެޓަ ކުންފުނިން ބުންޏެވެ.
ރިޕޯޓުތައް ބުނާ ގޮތުން ހަމަލާ ދިން މީހާ ތިން އަހަރު ބޭންކުގެ ވަގުތީ މުވައްޒަފެއްގެ ގޮތުގައި އުޅެފައި ދާއިމީ މަގާމެއް ލިބުނީ މީގެ އަހަރެއް ކުރިންނެވެ.
އެމެރިކާގެ ނޫސްތަކުން ބުނީ ބޭންކުން އޭނާ ކަނޑާލަން ނިންމައި ރަސްމީކޮށް އެކަން އެންގި ކަމަށެވެ. ބޭންކަށް ހަމަަލާ ދޭން ނިންމީ އޭގެ ފަހުން ކަމަށް ބެލެވެ އެވެ.
ތަފާސްހިސާބު ދައްކާ ގޮތުން މި އަހަރުގެ މިހާތަނަށް އެމެރިކާގައި ބަޑިޖަހައި ގިނަ ބަޔަކަށް އަނިޔާވުމުގެ 146 ހާދިސާ ރިޕޯޓުކޮށްފައިވެ އެވެ.
