އަންނަ އަހަރު އޮންނަ ރިޔާސީ އިންތިހާބުގައި ވެސް ވާދަކުރައްވާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެ އެވެ.
އެހެން ނަމަވެސް އެކަން ރަސްމީކޮށް އިއުލާން ކުރަން އަދި ތައްޔާރު ނޫން ކަމަށް އެންބީސީގެ ޓުޑޭ ޝޯއަށް ދެއްވި އިންޓަވިއުގައި އެ މަނިކުފާނު ވިދާޅުވި އެވެ.
"އަޅުގަނޑު ވިސްނައިގެން މި ހުރީ ވާދަކުރަން... އެކަމަކު އިއުލާން ކުރަން އަދި ތައްޔާރެއް ނޫން."
މީގެ ކުރިން ވެސް ބައިޑެން ވަނީ ދެ ވަނަ ދައުރަކަށް ވާދަކުރައްވަން ބޭނުންފުޅުވާކަން ހާމަކުރައްވައިފަ އެވެ. އެމަނިކުފާނާ އެކު ނައިބު ކަމަށް ވާދަކުރައްވާނީ މިހާރުގެ ވެސް ނައިބު ރައީސް ކަމަލާ ހެރިސް އެވެ.
ވެރިކަމުގައި އޮތް ޑިމޮކްރެޓިކް ޕާޓީގެ ޓިކެޓް ހޯދަން ދެ ކެންޑިޑޭޓުން ވަނީ މިހާތަނަށް ރަސްމީކޮށް އިއުލާންކޮށްފަ އެވެ. އެއީ މެރިއޭން ވިލިއަމްސަން އާއި ރޮބަޓް ކެނެޑީ ޖޫނިއާ އެވެ.
މިހާރު އުމުރުފުޅުން 80 އަހަރުގެ ބައިޑެންއަކީ އެމެރިކާގެ ތާރީހުގައި އެންމެ އުމުރުން ދުވަސްވީ ރައީސެވެ. އަންނަ އަހަރުގެ އިންތިހާބު ކާމިޔާބުވެއްޖެ ނަމަ، ދެ ވަނަ ދައުރު ނިމޭއިރު އެމަނިކުފާނުގެ އުމުރުން ހުންނަވާނީ 86 އަހަރު ފުރިފަ އެވެ.
