ލިވަޕޫލް (އޭޕްރީލް 9) - އިނގިރޭސި ޕްރިމިއާ ލީގުގެ އެއް ވަނައިގައި އޮތް އާސެނަލުން ދެ ގޯލުގެ ލީޑެއް ނަގާފައިވަނިކޮށް، ލިވަޕޫލުން މިރޭ ފަހަތުން އަރައި 2-2 އިން އެއްވަރުކޮށް، ލީގުގެ ރޭހުގައި މެންޗެސްޓާ ސިޓީ އަށް ހިތްހަމަޖެހުމެއް ހޯދައިދީފި އެވެ.
ލީގުގެ އެއް ވަނައިގައި އާސެނަލް މި ވަގުތު އޮތީ ދެ ވަނައިގައި އޮތް ސިޓީ އަށް ވުރެ އެއް މެޗު އިތުރަށް ކުޅެގެން ހަ ޕޮއިންޓުގެ ލީޑަކާ އެކު އެވެ.
އެ ގޮތުން، ލީގުގެ ތާވަލް މި ވަގުތު އޮތް ގޮތަށް ބަލާއިރު، އާސެނަލަށް ވަނީ 30 މެޗުން 73 ޕޮއިންޓް ލިބިފަ އެވެ. ދެ ވަނައިގައި އޮތް ސިޓީގެ އޮތީ 29 މެޗުން 27 ޕޮއިންޓެވެ. ސިޓީން މެޗު ހަމަކޮށް، އަމިއްލަ ދަނޑުގައި އާސެނަލް އަތުން މޮޅުވެއްޖެނަމަ ލީގުގެ އެއް ވަނަ އަށް އެރުމުގެ ފުރުސަތު އޮތީ ހުޅުވިފަ އެވެ.
ލިވަޕޫލްގެ އެންފީލްޑް ސްޓޭޑިއަމްގައި ކުޅުނު މެޗުގެ އަށް ވަނަ މިނިޓްގައި އާސެނަލުން ލީޑުނެގި އެވެ. މި ލަނޑު ޖެހީ ގަބްރިއެލް މާޓިނެލީ އެވެ. ލިވަޕޫލްގެ ޑިފެންސް ތެރެއިން އެ ޓީމުގެ ވާޖިލް ވެން ޑައިކް ހެދި ގޯހެއްގެ ފައިދާނަގައި، މާޓިނެލީ ވަނީ ގޯލަށް ބޯޅަ ފޮނުވާލައިފަ އެވެ. ލިވަޕޫލަށް އެއްވަރުކޮށްދޭން އެންޑީ ރޮބަޓްސަން އަށް ލިބުނު ފުރުސަތުން ޖެހި ބޯޅަ ދިޔައީ ގޯލު ކުރިމަތިން ހުރަސްވެގެންނެވެ.
އާސެނަލުން ވަނީ މެޗުގެ 28 ވަނަ މިނިޓްގައި ލީޑުފުޅާކޮށްފަ އެވެ. މިއީ މާޓިނެލީ އޭރިއާތެރެއަށް ހުރަސްކޮށްލި ބޯޅައަކަށް ހުސްކޮށް ފުންމައިގެން އަރައި، ގަބްރިއެލް ޖީސޫސް ބޮލުން ގޯލުގެ ކަނަށް ބޯޅަ އަމާޒުކޮށްލައިގެން ޖެހި ގޯލެކެވެ.
ފުރަތަމަ ހާފު ނިމުމުގެ ކުރިން ލިވަޕޫލުން ވަނީ ގޯލެއް ޖަހައިފަ އެވެ. އެ ގޮތުން މެޗުގެ 42 ވަނަ މިނިޓްގައި އާސެނަލް އޭރިއާތެރެއިން މުހައްމަދު ސަލާހު އަށް ލިބުނު ފުރުސަތުން އޭނާ ޖެހި ބޯޅަ ވަނީ ގޯލުގެ ކަނަށް އަމާޒުވެފަ އެވެ.
އެކަމަކު، ދެ ވަނަ ހާފުގެ ކުރީކޮޅުގައި ލިވަޕޫލަށް އެއްވަރުކޮށްދޭން ލިބުނު ރަނުގެ ފުރުސަތަކުން ސަލާހު ޖެހި ޕެނަލްޓީ ދިޔައީ ގޯލު ދަނޑިކައިރިން ބޭރުންނެވެ. މިއީ، ލިވަޕޫލްގެ ޑިއޯގޯ ޖޮޓާ އަށް އާސެނަލްގެ ރޮބް ހޯލްޑިން ކުރި ފައުލަކަށް ދިން ޕެނަލްޓީ އެކެވެ. ސަލާހު މި ވަނީ އެންމެ ފަހުން ޖެހި ދެ ޕެނަލްޓީ ވެސް ބޭކާރުކޮށްލައިފަ އެވެ. ބޯންމައުތު ކޮޅަށް ސަލާހު ޖެހި ޕެނަލްޓީ ދިޔައީ ހުރަސްދަނޑިމަތިންނެވެ.
އާސެނަލަށް ލީޑުފުޅާކޮށްދޭން ކޯނަަރަކުން، އައި ބޯޅައެއްގައި ހުސްކޮށް ހުރެފައި، އާސެނަލްގެ ޑިފެންޑަރު، ގަބްރިއެލް މަގާޅައެސް ބޮލުން ފޮނުވާލި ހަމަލާ އަމާޒުވީ ލިވަޕޫލްގެ ކީޕަރު އެލިސަން ބެކާ އަތަށެވެ.
ލިވަޕޫލުން މެޗުގެ ފަހު ކޮޅުގައި އެޓޭކަށް ޖެހި، ނުރައްކާތެރި ގިނަ ހަމަލާތަކެއް ފޮނުވާލި އެވެ. އެ ގޮތުން ބަދަލަކަށް ކުޅެން އެރި ޑާވިން ނޫނޭޒް ހުސްކޮށް އަރައި ޖެހި ބޯޅަ އާސެނަލްގެ ކީޕަރު އާރޮން ރަމްސްޑޭލް މަތަކުރި އެވެ.
މެޗުގެ 87 ވަނަ މިނިޓްގައި ޓްރެންޓް އަލެކްސަންޑާ އާނޯލްޑް ނެގި ހުރަހަކުން ލިވަޕޫލްގެ ރޮބާޓޯ ފިރްމީނޯ ވަނީ ބޮލުން ގޯލަށް ބޯޅަ ފޮނުވާލައި، ނަތީޖާ ހަމަހަމަކޮށްދީފަ އެވެ. އޭގެ ފަހުން މެޗުގެ އިތުރު ވަގުތުގައި ލިވަޕޫލްގެ ސަލާހާއި ޑިފެންޑަރު، އިބްރާހިމާ ކޮނާޓޭ ގޯލަށް ޖަހަން ފޮނުވާލި ބޯޅަތައް ކީޕަރު ރަމްސްޑޭލް ވަނީ މަތަކޮށްފަ އެވެ.
މި ނަތީޖާއާ އެކު، ލީގުގެ ގަދަ ހަތަރެއްގައި މި ފަހަރ ނިންމާލައި، އަންނަ ސީޒަނުގެ ޗެމްޕިއަންސް ލީގުގައި ކުޅުމުގެ ފުރުސަތު ލިވަޕޫލަށް ވަނީ ވަރަށް ބޮޑަށް ހަނިވެފަ އެވެ. ލިވަޕޫލް މި ވަގުތު ލީގުގެ އަށް ވަނައިގައި އޮތީ 29 މެޗުން 44 ޕޮއިންޓާ އެކު އެވެ. ހަތަރެއްގައި އޮތް މެންޗެސްޓާ ޔުނައިޓެޑަށް 29 މެޗުން ވަނީ 56 ޕޮއިންޓް ލިބިފަ އެވެ.
ލީގުގައި މިރޭ ކްރިސްޓަލް ޕެލަސް އިން ވަނީ ފަަހަތުން އަރައި، 5-1 އިން ލީޑްސް ޔުނައިޓެޑް ބަލިކޮށްފަ އެެވެ. މިއީ ރޯއީ ހޮޖްސަން ހަވާލުވިފަހުން ޕެލަސް ކުޅުނު ދެ ވަނަ މެޗެވެ. ދެ މެޗުން ވެސް ޕެލަސް ވަނީ މޮޅުވެފަ އެވެ. މި މެޗުން ލިބުނު ތިން ޕޮއިންޓާ އެކު، ޕެލަސް އޮތީ 30 މެޗުން 33 ޕޮއިންޓާ އެކު ލީގުގެ 12 ވަނައިގަ އެވެ.
