މަރުވީ ކަމަށް ހެދިގެން ދެކުނު އެފްރިކާގެ ޖަލަކުން ފިލި ރޭޕިސްޓު އަދި ގާތިލް ތާބޯ ބެސްޓާ ޓެންޒޭނިއާގައި ހައްޔަރުކޮށްފި އެވެ.
ތާބޯ ބެސްޓާ މަރުވީ ކަމަށް ބެލެވުނީ މީގެ އަހަރެއް ކުރިން އޭނާގެ ޖަލު ގޮޅީގައި އަލިފާން ރޯވެ މަރުވެފައި އޮތް މީހެއްގެ ހަށިގަނޑު ފެނުމުންނެވެ.
އެހެން ނަމަވެސް މިދިޔަ މަހު ހެދި ޕޯސްޓު މޯޓަމްގެ ނަތީޖާއިން އެނގުނު ގޮތުގައި އެއީ އޭނާގެ ހަށިގަނޑެއް ނޫނެވެ. އެހެންވެ، އޭނާ ހޯދަން އޮޕަރޭޝަނެއް ފެށި އެވެ.
ބެސްޓާ އާއި އޭނާގެ ލޯބިވެރިޔާ އަދި ތިން ވަނަ މީހަކު ޓެންޒޭނިއާގައި ހައްޔަރު ކުރީ ހުކުރު ދުވަހު އެވެ. އެ މީހުން ދެކުނު އެފްރިކާއަށް ގެންދާނެ ކަމަށް ބެލެވެ އެވެ.
ފުލުހުން ބުނީ ބެސްޓާ އާއި އޭނާގެ ލޯބިވެރިޔާ ފިލައިގެން ކެންޔާއަށް ދާން އުޅުނު ކަމަށެވެ.
"ފޭސްބުކް ރޭޕިސްޓު"ގެ ގޮތުގައި ބެސްޓާ މަޝްހޫރުވީ ފޭސްބުކް ބޭނުންކޮށްގެން، މީހުންނަށް އޮޅުވާލައި އޭނާގެ ޝިކާރައަކަށް ހެދުމުންނެވެ.
އޭނާގެ މައްޗަށް 2012 ވަނަ އަހަރު ކުށް ސާބިތުވީ އޭރުގެ ލޯބިވެރިޔާ މޮޑެލް ނޮމްފުންޑޯ ޓީހުލޫ ރޭޕްކޮށް މަރާލުމުންނެވެ. އޭގެ އަހަރެއް ކުރިން ދެ އަންހެނުން ރޭޕްކޮށް ފޭރުނު ކަމަށް ވެސް ސާބިތުވި އެވެ.
