އިނގިރޭސި ބިލިއަނަރު ސާ ރިޗަޑް ބްރެންސަންގެ ރޮކެޓް ކުންފުނި ވާޖިން އޯބިޓް ބަނގުރޫޓުވެ، އެކަން ރަސްމީކޮށް އަންގައިފި އެވެ.
އެ ކުންފުނީގެ މަސައްކަތްތައް މެދުކަނޑާލީ މީގެ ހަފުތާތަކެއް ކުރިންނެވެ. އެ ކުންފުނިން ބަލަމުން ދިޔައީ އިންވެސްޓް ކުރާނެ ބަޔަކު ލިބޭތޯ އެވެ.
ކެލިފޯނިއާގައި މައި އޮފީސް ހުންނަ ކުންފުނިން މިދިޔަ ހަފުތާގައި ބުނީ 750 މުވައްޒަފުންގެ 85 ޕަސެންޓު ވަޒީފާއިން ވަކިކުރަން ޖެހިފައިވާ ކަމަށެވެ.
މި އަހަރުގެ ކުރީކޮޅު އިނގިރޭސިވިލާތުގެ ފަސްގަނޑުން ފުރަތަމަ ފަހަރަށް ސެޓެލައިޓެއް ލޯންޗުކުރަން ވާޖިން އޯބިޓްގެ ރޮކެޓެއް މަސައްކަތްކޮށް، ފެއިލްވި އެވެ.
ކުންފުނި ހިންގުމާ ހަވާލުވެ ހުރި ޑޭން ހާޓް ބުނީ މާލީ ކަންކަން ހަމަޖައްސައި އިތުރު ފަންޑު ހޯދަން މަސައްކަތް ކުރި ނަމަވެސް ކުރި ނުލިބޭ ކަމަށެވެ.
ވާޖިން އޯބިޓް އުފެއްދީ 2017 ގަ އެވެ. އެއީ ސާ ރިޗަޑް ބްރެންސަންގެ ޖައްވީ ފަތުރުވެރިކަމަށް ހާއްސަ ކުންފުނި ވާޖިން ގެލެކްޓިކްއާ ގުޅުން ހުރި ކުންފުންޏެކެވެ.
އެ ކުންފުނިން ޖައްވަށް ސެޓެލައިޓް ފޮނުވަން ބޭނުންވާ ރޮކެޓު ލޯންޗު ކުރުމަށް ބޭނުންކުރަނީ ބަދަލު ގެނެސްފައިވާ ބޮއިންގް 747 މަތިންދާބޯޓުތަކެވެ.
އެހެން ނަމަވެސް، މި އަހަރުގެ ކުރީކޮޅު އިނގިރޭސިވިލާތުގައި ރޮކެޓް ލޯންޗު ކުރުން ފެއިލްވުމުން، ކުންފުންޏަށް ފަންޑު ހޯދަން ދަތިވި އެވެ.
މިދިޔަ އަހަރުގެ ސެޕްޓެމްބަރު މަހާ ހަމައަށް ކުންފުނީގެ ދަރަނީގެ އަގު އުޅެނީ 153.5 މިލިއަން ޑޮލަރުގަ އެވެ. އަންގާރަ ދުވަހު ކުންފުނިން ބުނީ ވާޖިން ގްރޫޕްގައި ހިމެނޭ ވާޖިން އިންވެސްޓްމަންޓްސް ކުންފުނިން ފޯރުކޮށްދޭ 31.6 މިލިއަން ޑޮލަރުގެ އެހީގައި ވާޖިން އޯބިޓް ގަންނާނެ ފަރާތެއް ހޯދުމުގެ މަސައްކަތް ކުރާނެ ކަމަށެވެ.
އެމެރިކާގައި ކުންފުންޏެއް ބަނގުރޫޓުވެއްޖެކަން ރަސްމީކޮށް އަންގައި، ވިޔަފާރި ހިމާޔަތް ކުރަން ރައްކާތެރިކަން ހޯދެ އެވެ. އެގޮތުން ކުންފުނީގެ ދަރަނިތައް ހިފަހައްޓައި، މާލީ ކަންކަން ހަމަޖެއްސުމާ ހަމައަށް އޮޕަރޭޓް ކުރުމުގެ ފުރުސަތު ލިބޭނެ އެވެ.
