ހަތް މަހެއްހާ ދުވަހު ކްލަބް ލެވަލްގެ މެޗެއް ނުކުޅެ ތިބުމަށް ފަހު އަލުން މެޗަކަށް ނުކުންނަން ޖެހުމުން އެ ހުރި އުނދަގޫތަކުގެ އަސަރު މާޒިޔާ ސްޕޯޓްސް އެންޑް ރެކްރިއޭޝަން ޓީމުގެ ކުޅުންތެރިންގެ ފަރާތުން ރޭގެ އެފްއޭ ޗެރިޓީ ޝީލްޑް މެޗުގައި ފެނުނު ކަމަށް އެ ޓީމުގެ ކޯޗު ބަލްގޭރިއާގެ އިވާން ވެންކޯވް ކޮލޭވް ބުނެފި އެވެ.
ފުރަތަމަ ހާފުގައި ޖެހި ދެ ގޯލާ އެކު، 2-1 އިން ކްލަބް އީގަލްސް ބަލިކޮށް މާޒިޔާ އިން ވަނީ އެ ކްލަބްގެ ތާރީހުގައި ފަސް ވަނަ ފަހަރަށް ސީޒަން ހުޅުވުމަށް ކުޅޭ ޗެރިޓީ ޝީލްޑް މެޗުން މޮޅުވެފަ އެވެ.
މި މެޗަކީ މާޒިޔާގެ ކޯޗުކަމާ މި ސީޒަނުގައި ހަވާލުވި އިވާންގެ އިރުޝާދުގެ ދަށުން މާޒިޔާ އިން ކުޅުނު ފުރަތަމަ މެޗެވެ. މި މެޗުގެ ފުރަތަަމަ 18 މިނިޓް ތެރޭ މާޒިޔާ އިން ދެ ގޯލު ޖެހިއިރު، މެޗުގެ ބާކީ ބައިގައި ގޯލު ޖަހަން ފުރުސަތު ލިބި ބޭނުމެއް ނުހިފުނެވެ.
މެޗަށް ފަހު އިން އިންޓަވިއުއެއްގައި އިވާން ބުނީ ހިތްހަމަޖެހުމަކީ މޮޅުވުން ކަމަށާއި މި ކަަހަލަ މެޗަކަށް ނުކުންނައިރު އެންމެ މުހިންމު ކަންތަކަކީ ނަތީޖާ ނެރުން ކަމަށެވެ.
"އަހަރެން ބޭނުން ކުޅުންތެރިންނަށް މަރުހަބާ ކިޔަން، އެއީ އެ މީހުން ވަރަށް ރަނގަޅަށް ކުޅެފި،" އިވާން ބުންޏެވެ.
"ރަނގަޅު ވާހަކައެއް އަހަރެމެން ވަރަށް ގިނަ ގޯސްތަކެއް ވެސް ހެދި މި މެޗުގައި. އެއީ ނޯމަލް ކަމެއް، އެއީ ތި މީހުން ވެސް ތި އޮތީ ބުނެފައި ހަތް މަސް ފަހުންނޭ މެޗަކަށް މި ގޮތަށް މި ނުކުތީ، އެހެންވީމަ ހަތް މަސް ފަހުން މެޗެއް ކުޅޭއިރު، ކުއްލިއަކަށް ގޮސް ކުޅެން ފަށައިގެން ހުރިހާ ކަމެއް ރަނގަޅަށް ނުކުރެވޭނެ، އެކަމަކު ވީ އެންމެ ރަނގަޅަށް ކުރި މަސައްކަތް އަހަރެން ބަލައިގަންނަން،"
އިވާން ބުނީ ޔަގީންކަމާ އެކު ބުނަން އެނގޭ ވާހަކަ އަކީ މި އަށް ވުރެ ރަނގަޅަށް ކުރިއަށް އޮތްތަނުގައި މާޒިޔާގެ ކުޅުންތެރިން ޕާފޯމްކުރާނެކަން ކަމަށެވެ.
"ޔަގީންކަމެއް ކުރިއަށް އޮތްތަނުގައި އަހަރެމެންގެ އެޓޭކް މި އަށް ވުރެން ރަނގަޅުކުރެވޭނެ. ލިބޭ ފުރުސަތުތައް ރަނގަޅަށް ނިންމާލެވޭނެ. އުންމީދަކީ ދެން މެޗެއްގައި މި އަށް ވުރެ ރަނގަޅުކޮށް ކުރިއަށް ދިއުން،"
އެފްއޭއެމުން ފުޓްބޯޅަ ސީޒަން ފެއްޓި ނަަމަވެސް ރަސްމީ ސިފައެއްގައި ސީޒަން ކަލަންޑަރު މީޑިއާ އަށް އާންމުކޮށްފައެއް ނުވެ އެވެ. ކްލަބްތަކަށް ހިއްސާކޮށްފައިވާ ކަލަންޑަރުގައިވާ ގޮތުން މި މަހު އަށް ވަނަ ދުވަހު ޕްރެޒިޑެންޓްސް ކަޕް ފަށާނެ އެވެ. އެކަމަކު، މި ވަގުތު ފުރަތަމަ ޑިވިޝަނުގެ އަށް ކްލަބްގެ ތެރެއިން ޕްރެކްޓިސް ކުރަނީ ތިން ކްލަބް ކަމަށްވާއިރު، ޕްރެޒިޑެންޓްސް ކަޕް މިހާރު އޮތް ތާރީހަށް ނުފެށުމުގެ ފުރުސަތު އެބައޮތެވެ.
"ދެން އޮތް މުބާރާތް ފަށާ ސީދާ ތާރީހެއް ނޭނގުނު ކަމުގައި ވިޔަސް އަހަރެމެން މި ކުރާ މަސައްކަތް ކުރިއަށްދިއުން މީގެ މުހިންމީ،" އިވާން ބުންޏެވެ.
އެންމެ ގިނަ ފަހަރު ޝީލްޑް އުފުލާލުމުގެ ރެކޯޑް އޮތް މާޒިޔާ އިން މި ވަނީ 2015، 2016، 2017، 2021 އަދި 2023 ވަނަ އަހަރު އެވެ.
