އިޒްރޭލުން ސީރިއާއަށް ދިން ވައިގެ ހަމަލާއެއްގައި އިރާނުގެ ރިވޮލިޔުޝަނަރީ ގާޑް ކޯޕްސްގެ އިސް މެމްބަރަކު މަރުވެއްޖެ އެވެ.
މިގްދާދް މެހްގަނީ ޖަފަރްއާބާދީ ސީރިއާގައި އުޅުނީ އަސްކަރީ އެޑްވައިޒަރެއްގެ ގޮތުގަ އެވެ. އޭނާ މަރުވީ ދިމިޝްކު ކައިރިއަށް ދިން ވައިގެ ހަމަލާއެއްގަ އެވެ.
ރިވޮލިއުޝަނަރީ ގާޑްސްއިން ނެރުނު ބަޔާނެއްގައި ބުނީ އޭނާ މަރުވީ ހަމަލާގައި ލިބުނު ޒަހަމްތަކުގައި ކަމަށެވެ.
"ޒަޔޮނިސްޓު ސަރުކާރުގެ ޖަރީމާތަކަށް އަދަބުދެވޭނެ. މިކަމަށް ޖަވާބުދާރީވެ އަގު އަދާކުރަން ޖެހޭނެ،" އިޒްރޭލުގެ ސަރުކާރަށް ނިސްބަތްކޮށް އެ ބަޔާނުގައި ބުންޏެވެ.
ސީރިއާގައި އުޅޭ އިރާނުގެ ޓެރަރިސްޓުން މަރަން ކަމަށް ބުނެ އިޒްރޭލުން ވައިގެ ހަމަލާތައް ދޭތާ ގިނަ އަހަރުތަކެއް ވެއްޖެ އެވެ.
ސީރިއާގައި 2011 ވަނަ އަަހަރު ފެށި ދާހިލީ ހަނގުރާމައިގައި އިރާނުން ވަނީ އެ ގައުމުގެ ރައީސް ބައްޝާރުލް އަސަދަށް އެހީތެރިކަން ފޯރުކޮށްދޭން ފަށައިފަ އެވެ.
އިރާނުން ބުނާ ގޮތުގައި އެ ގައުމުގެ ސިފައިން ސީރިއާގައި ހަރަކާތްތެރި ވަނީ ސީރިއާ ސަރުކާރުގެ ދައުވަތަކަށް އަސްކަރީ އެޑްވައިޒަރުންގެ ގޮތުގައި ކަމަށެވެ.
މީގެ ކުރިން ވެސް އިޒްރޭލުގެ ހަމަލާތަކުގައި އިރާން ސިފައިންގެ މީހުން މަރުވެފައިވެ އެވެ. ހުކުރު ދުވަހު ދިން ހަމަލާއަކީ މާޗް މަހު އިޒްރޭލުން ދިން ހަ ވަނަ ހަމަލާ އެވެ.
