އެމެރިކާގެ ދެކުނާއި ހުޅަނގު މެދުތެރޭ ހިސާބަށް އެރި ނަގޫރޯޅިތަކެއްގައި 26 މީހުން މަރުވެއްޖެ އެވެ.
ނަގޫރޯޅިތަކުގެ އަސަރު ގިނަ ސިޓީތަކާއި އަވަށްތަކަށް ކުރި އިރު، ގެތައް ސުންނާފަތިވެ ބޮޑު ސަރަހައްދުތަކުން ކަރަންޓު ކެނޑުނެވެ.
ވޮޝިންޓަން ޕޯސްޓު ނޫހުން ރިޕޯޓުކުރި ގޮތުގައި އެއް ފަހަރާ 60 އަށް ވުރެ ގިނަ ނަގޫރޯޅި ދަތުރު ކުރަމުން ދިޔަ އެވެ.
އާކަންސާ، ޓެނެއްސީ، އިލިނޮއި، އިންޑިއާނާ، އަލަބާމާ އަދި މިސިސިޕީ ސްޓޭޓުން މީހުން މަރުވި އިރު، ގިނަ ބަޔަކަށް ބޮޑެތި ގެއްލުން ލިބުނެވެ.
އާކަންސާގެ ގަވަރުނަރު ސާރާ ހަކަބީ ސެންޑާޒް ވިދާޅުވީ އެ ސްޓޭޓުގައި ކުއްލި ނުރައްކަލުގެ ހާލަތު އިއުލާނުކޮށް އާއްމުންނަށް އެހީވުމަށް ބޮޑު އޮޕަރޭޝަނެއް ކުރިއަށް ގެންދާ ކަމަށެވެ.
އެ ސްޓޭޓުގެ ހާލަތާ ގުޅޭ ގޮތުން ރައީސް ޖޯ ބައިޑެންއާ ވާހަކަދައްކާފައިވާ ކަމަށް ގަވަރުނަރު ވިދާޅުވި އެވެ. ބައިޑެން ވައުދުވެވަޑައިގެންނެވީ މައި ސަރުކާރުގެ އެހީ ދިނުމަށެވެ.
އެމެރިކާގެ ޕަވާއައުޓޭޖް ވެބްސައިޓުން ބުނާ ގޮތުގައި އެންމެ ބޮޑު ސަރަހައްދުތަކުން ކަރަންޓު ކެނޑިފައި ވަނީ ވާޖިނިއާ، އޮހާޔޯ އަދި ޕެންސިލްވޭނިއާ ސްޓޭޓުގަ އެވެ.
މީގެ ހަފުތާއެއް ކުރިން ވެސް މިސިސިޕީއަށް ކުރިމަތިވި ބާރުގަދަ ނަގޫރޯޅިއެއްގެ ސަބަބުން 26 މީހުން މަރުވި އެވެ. އެ ފަހަރު 2000 ގެ ސުންނާފަތިވި އެވެ.
