އަންހެނަކާ އެކު ބޭއްވި ގުޅުން ސިއްރުކުރަން ފައިސާ ދިން ކަމަށް ތުހުމަތު ކުރާ މައްސަލައިގައި އެމެރިކާގެ ކުރީގެ ރައީސް ޑޮނަލްޑް ޓްރަމްޕްއާ ދެކޮޅަށް ޖިނާއީ ދައުވާ އުފުލަން ނިންމައިފި އެވެ.
ބަރަހަނާ ފިލްމު ކުޅުމަށް މަޝްހޫރު ސްޓޯމީ ޑެނިއެލްސްއާ އެކު ޓްރަމްޕް ބޭއްވި ޖިންސީ ގުޅުންތަކުގެ ވާހަކަ ސިއްރުކުރަަން 2016 ވަނަ އަހަރުގެ ރިޔާސީ އިންތިހާބުގެ ކުރިން 130،000 ޑޮލަރު ދިން ކަަމަށް ތުހުމަތު ކުރާ މައްސަލަ ބެލުމަށް ފަހު ގްރޭންޑް ޖޫރީއިން ނިންމީ ދައުވާ އުފުލުމަށެވެ.
އުމުރުން 76 އަހަރުގެ ޓްރަމްޕް އެ ތުހުމަތު ދޮގުކުރައްވަ އެވެ. އެމަނިކުފާނަކީ އެމެރިކާގެ ތާރީހުގައި ވެސް ޖިނާއީ ދައުވާއެއް ކުރިމަތިވި ފުރަތަމަ ކުރީގެ ރައީސެވެ.
ރިޕޯޓުތައް ބުނާ ގޮތުން ފްލޯރިޑާގައި ދިރިއުޅުއްވާ ޓްރަމްޕް ހޯމަ ދުވަހު ނިއު ޔޯކަށް ދަތުރު ކުރައްވައި، އަންގާރަ ދުވަހު ކޯޓަށް ވަޑައިގަންނަވާނެ އެވެ. އެމަނިކުފާނާ ދެކޮޅަށް އުފުލާ ދައުވާތައް އިއްވާނީ ކޯޓު އަޑުއެހުމުގަ އެވެ.
ޓްރަމްޕްއާ އެކު އޮތް ސިއްރު ގުޅުމުގެ ވާހަކަތައް ކިޔައިދޭން ބޭނުން ކަމަށް ބުނެ، ސްޓޯމީ ޑެނިއެލްސް ނޫސްތަކަށް ގުޅީ 2016 ވަނަ އަހަރު އެވެ. އޭނާ ބުނީ އެ ގުޅުން ބޭއްވީ ޓްރަމްޕް އާއި މިހާރުގެ އަނބިކަނބަލުން މެލާނިއާ ކައިވެނި ކުރެއްވި ފަހުން 2006 ވަނަ އަހަރުގައި ކަމަށެވެ.
އެކަމުގެ ހަބަރު ލިބި، ސްޓޯމީ ޑެނިއެލްސްގެ ވާހަކަތައް ހުއްޓުވުމަށް ޓްރަމްޕްގެ ވަކީލު މައިކަލް ކޯހެން އޭނާއަށް 130،000 ޑޮލަރު ދިން ކަމަށް ތުހުމަތު ކުރެވެ އެވެ. އެއީ ގާނޫނީ ކުށެކެވެ.
އެ އަދަދަށްވާ ފައިސާ ޓްރަމްޕްގެ ފަރާތުން ވަކީލަށް ފޮނުއްވި އެވެ. އެހެން ނަމަވެސް ރަސްމީ ލިޔުންތަކުގައި ބުނީ އެއީ ގާނޫނީ ފީތަކުގެ ގޮތުގައި ދައްކާ ފައިސާ ކަމަށެވެ. ޕްރޮސެކިއުޓަރުން ބުނީ އެއީ ވިޔަފާރި ލިޔުންތައް އޮޅުވާލުން ކަމަށެވެ. އެއީ ނިއު ޔޯކްގައި ޖިނާއީ ކުށެކެވެ.
ޓްރަމްޕް ނެރުއްވި ބަޔާނެއްގައި ނިއު ޔޯކްގެ ޕްރޮސެކިއުޓަރުންނަށް ވަރަށް ބޮޑަށް ފާޑުވިދާޅުވި އެވެ. އަދި މެންހެޓަން ޑިސްޓްރިކްޓުގެ އެޓޯނީ އުޅުއްވަނީ ރައީސް "ޖޯ ބައިޑެންގެ ވަގު އެޖެންޑާ ކުރިއަރުވަން" ކަމަށް ތުހުމަތު ކުރެއްވި އެވެ.
ސްޓޯމީ ޑެނިއެލްސް. -- ފޮޓޯ: ގެޓީ އިމޭޖާޒް
ޓްރަމްޕް އާއި އެމަނިކުފާނުގެ ސަޕޯޓަރުން ތަކުރާރުކޮށް ވިދާޅުވަނީ ދައުވާ ކުރަން އުޅެނީ ސިޔާސީ ބޭނުމެއްގައި ކަމަށެވެ. މި މައްސަލައިގެ ސަބަބުން 2024 ވަނަ އަހަރުގެ ރިޔާސީ އިންތިހާބަށް އަސަރު ކުރާނެ އެވެ.
އެގޮތުން ރިޔާސީ އިންތިހާބަށް ރިޕަބްލިކަން ޕާޓީގެ ޓިކެޓް ހޯދުމަށް ޓްރަމްޕް ހިންގަވާ ކެމްޕެއިނަށް ވެސް އޭގެ ސަބަބުން ހުރަސް އެޅޭނެ އެވެ. މި ވަގުތު އެ ޕާޓީގެ ކެންޑިޑޭޓުންގެ ތެރެއިން އެންމެ މަގްބޫލުކަން ބޮޑީ ޓްރަމްޕަށެވެ.
އެހެން ނަމަވެސް ޖިނާއީ ކުށެއް ސާބިތުވާ ކެންޑިޑޭޓަކު ކެމްޕެއިން ކުރެއްވުމާއި ރައީސްގެ މަގާމު އަދާކުރެއްވުން އެމެރިކާގެ ގާނޫނުން މަނާނުކުރެ އެވެ. ކެންޑިޑޭޓަކު ޖަލުގައި ހުންނެވި ނަމަވެސް ގާނޫނީ ހުރަހެއް ނެތެވެ.
