އިޒްރޭލަށް ގެންނަން އުޅޭ ޖުޑީޝަލް ބަދަލުތައް ދޫކޮށްލަން އެމެރިކާގެ ރައީސް ޖޯ ބައިޑެން ގޮވާލެއްވުމުން، އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ ނުރުހުން ފާޅުކޮށްފި އެވެ.
"އިޒްރޭލަށް މި މަގުން ކުރިއަކަށް ނުދެވޭނެ،" ޕްރެސް ކޮންފެރެންސެއްގައި ބައިޑެން ވިދާޅުވި އެވެ.
ރައްދުގައި ނަތަންޔާހޫ ކުރެއްވި ޓްވީޓެއްގައި ވިދާޅުވީ އިޒްރޭލުން ނިންމުންތައް ނިންމާނީ އަމިއްލައަށް ކަމަށާއި "އެއީ ބޭރުގެ ނުފޫޒުން ނިންމާ ނިންމުންތަކެއް ނޫން" ކަމަށެވެ.
އިޒްރޭލަށް ގެންނަން އުޅޭ ޖުޑީޝަލް ބަދަލުތަކާ މެދު ހިތްހަމަނުޖެހި އާއްމުން މުޒާހަރާ ކުރާތާ މަސްތަކެއް ވެއްޖެ އެވެ. ފިއްތުންތައް ބޮޑުވެ، ނަަތަންޔާހޫ އެންމެ ފަހުން ނިންމެވީ ބަދަލު ގެނައުން މަޑުޖެއްސުމަށެވެ.
ނަތަންޔާހޫއާ އެއްބައިވެގެން ކަނާއަތު ފިޔައިގެ ހަރުކަށި ޕާޓީތަކުން އުފައްދާފައިވާ ސަރުކާރުގެ އަމާޒަކީ ޝަރުއީ ނިޒާމަށް ބަދަލުތައް ގެނައުމެވެ. އެކަން ކުރަން ހާއްސަ ޕްލޭނެއް ވަނީ ހަދައިފަ އެވެ.
އޭގެ ދަށުން ޕާލަމެންޓުން ފާސްކުރި އާ ގާނޫނެއްގެ ދަށުން ބޮޑު ވަޒީރުގެ މަގާމުގައި ހުންނަވާ ބޭފުޅަކު އެ މަގާމުން ދުރުކުރުމަށް އެޓޯނީ ޖެނެރަލަށް ލިބިދޭ ބާރު ވަނީ އުނިކޮށްފަ އެވެ.
ފަނޑިޔާރުން އައްޔަންކުރަން ކަނޑައަޅާ ހާއްސަ ކޮމިޓީ ކޮންޓްރޯލް ކުރުމުގެ ބާރު ސަަރުކާރަށް ދިނުމަށް ވެސް ރާވާފައިވެ އެވެ.
ޝަރުއީ ނިޒާމަށް ބަދަލުތަކެއް ގެންނަން ބޮޑު ވަޒީރު ބެންޖަމިން ނަތަންޔާހޫ ނިންމެވީ ސަރުކާރުގެ އެކި ގޮފިތައް ބެލެންސް ކުރުމަށް ކަމަށް ވިދާޅުވެ އެވެ.
