އެމެރިކާގެ ޓެނެއްސީ ސްޓޭޓުގެ ނޭޝްވިލް ސިޓީގައި ހިންގާ ޕްރައިވެޓް ސްކޫލެއްގައި ބަޑި ޖަހައި، ތިން ކުދިން ހިމެނޭ ގޮތަށް، ހަ މީހުން މަރާލައިފި އެވެ.
ތުހުމަތު ކުރެވޭ މީހާ ހުއްޓުވަން ފުލުހުން ހަރަކާތްތެރިވުމުގެ ތެރޭގައި އޭނާ ވެސް ވަނީ މަރުވެފަ އެވެ. އެއީ އުމުރުން 28 އަހަރުގެ އަންހެނެކެވެ.
ދަ ކޮވެނަންޓް ސްކޫލްގެ ތިން ދަރިވަރަކު މޮންރޯ ކެރެލް ޖޫނިއާ ޗިލްޑްރެންސް ހޮސްޕިޓަލަށް ގެންދިޔަ އިރު ވެސް ވަނީ މަރުވެފަ އެވެ.
އެއީ 2001 ވަނަ އަހަރު އުފެއްދި ނަސާރާ ދީނުގެ ސްކޫލެކެވެ. އެ ތަނުގައި އުމުރުން 11-3 އަހަރުގެ 200 އެއްހާ ކުދިން ކިޔަވަމުންދެ އެވެ.
އެ ހާދިސާއާ ގުޅޭ ތަފްސީލް އެމެރިކާގެ ރައީސް ޖޯ ބައިޑެންއަށް އަރުވާފައިވާ ކަމަށާއި އެމަނިކުފާނު ގޮވާލަނީ ކޮންގްރެސްއިން ލަސްނުކޮށް އަމަލު ކުރުމަށް ކަމަށް ވައިޓް ހައުސް އިން ބުންޏެވެ.
ބަޑި ޖެހުމުގެ ހާދިސާތައް އެމެރިކާގައި ވަރަށް ގިނައިން ހިނގަ އެވެ. އެކަމަކު ފަހަކަށް އައިސް ސްކޫލްތަކުގައި އެފަދަ ހާދިސާތައް ހިނގުން ވަނީ އިތުރުވެފަ އެވެ.
