ފަލަސްތީނުގެ ރައްޔިތުންނަކީ އުޅޭ ބަޔެއް ނޫން ކަމަށް ވިދާޅުވެ އިޒްރޭލުގެ ފިނޭންސް މިނިސްޓަރު ދެއްކެވި ވާހަކައާ މެދު ހިތްހަމަނުޖެހި ގަލްފް ކޯޕޮރޭޝަން ކައުންސިލުން އެމެރިކާއަށް ސިޓީއެއް ފޮނުވައިފި އެވެ.
ޖީސީސީގެ ސިޓީ ފޮނުވީ އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެންއަށެވެ. ސިޓީގައި ގަލްފު ގައުމުތަކުން އެމެރިކާއަށް ގޮވާލީ ފަލަސްތީނުގެ ރައްޔިތުންނާ މެދު އަމަލުކުރަމުންދާ ގޮތާ ދެކޮޅަށް ތެދުވުމަށެވެ.
ޖީސީސީގެ މެމްބަރު ހަ ގައުމުގެ ފޮރިން މިނިސްޓަރުން އެ ސިޓީގައި ސޮއިކުރެއްވި އެވެ. ޖީސީސީގެ މެމްބަރު ގައުމުތަކަކީ ސައުދީ އަރަބިއްޔާ، ޔޫއޭއީ، ބަހްރެއިން، އޮމާން، ގަތަރު އަދި ކުވެއިތެވެ.
އިޒްރޭލާއި ފަލަސްތީނުގެ މައްސަލައަށް "ދާއިމީ އަދި ފުރިހަމަ ހައްލެއް ގެނައުމުގައި އެމެރިކާއިން ވަކި އަތަކަށް ނުޖެހޭ ހަމަހަމަ ދައުރެއް އަދާކުރުމަށް" އެ ސިޓީގައި ގޮވާލި އެވެ.
މިދިޔަ ހަފުތާގެ އާދީއްތަ ދުވަަހު އިޒްރޭލުގެ ފިނޭންސް މިނިސްޓަރު ބެޒަލޭލް ސްމޮޓްރިޗް ވިދާޅުވީ "ފަލަސްތީނުގެ ރައްޔިތުންނޭ ކިޔާ ބަޔަކު ނޫޅޭ" ކަމަށާއި ފަލަސްތީނުގެ ތާރީހެއް އަދި ސަގާފާތެއް ވެސް ނޯންނަ ކަމަށެވެ.
އެ ވާހަކަތަކާ އެކު އަރަބި ގައުމުތަކުން ނުރުހުން ފާޅުކުރި އެވެ. އެމެރިކގެ ސްޓޭޓް ޑިޕާޓްމަންޓުން ބުނީ އެއީ "ކަންބޮޑުވުން ހުރި، ނުރައްކާތެރި އަދި އެއްވެސް ހަގީގަަތެއް ނެތް ވާހަކައެއް" ކަމަށެވެ.
އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ އަލުން ވެރިކަމަށް ވަޑައިގެންނެވީ މިދިޔަ ޑިސެމްބަރު މަހު އެކުލަވާލި ކަނާއަތު ފިޔައިގެ ހަރުކަށި ޕާޓީތައް ހިމެނޭ ސަރުކާރަކާ އެކު އެވެ.
