ހުކުރު ދުވަހުގެ ރޭ އެމެރިކާގެ މިސިސިޕީ ސްޓޭޓަށް އެރި ނަގޫރޯޅިއެއްގައި 23 މީހުން މަރުވެއްޖެ އެވެ.
ބިމާ ހަމަވެފައިވާ އިމާރާތްތަކުގެ ދަށުގައި ގިނަ ބަޔަކު ތާށިވެފައިވާ ކަމަށް ބެލެވެ އެވެ. ނަގޫރޯޅީގެ ސަބަބުން ރަށްފުށުގެ ގިނަ އަވަށްތަކަކަށް ގެއްލުން ލިބުނެވެ.
ގަސްތަކާއި ކަރަންޓު ހޮޅިތައް ވެއްޓި، އެތައް ހާސް ގޭބިސީއަކުން ކަރަންޓު ކެނޑުނު ކަމަށް ރިޕޯޓުތައް ބުނެ އެވެ.
ނަގޫރޯޅީގައި ގެއްލުން ލިބިފައިވާ އިރު، ދެކުނުގެ އެހެން ސްޓޭޓްތަކަށް ތޫފާން އަރާނެކަމުގެ އިންޒާރު ދީފައިވެ އެވެ.
މިސިސިޕީ ސްޓޭޓުގެ ބައެއް ހިސާބުތަކަށް "ހެއިލްސްޓޯމް" ނުވަތަ ގަނޑުފެނުގެ ވާރޭ ވެހުނު ކަމަށް ރިޕޯޓުތައް ބުނެ އެވެ.
އޮކްލަހޯމާ ޔުނިވާސިޓީގެ ސްކޫލް އޮފް މީޓިއޮރޮލޮޖީގެ ސޭމް އެމެސަން ވިދާޅުވީ ނަގޫރޯޅިއާ އެކު 30،000 ފޫޓު އުހަށް ކުނިތައް ވަޔާ އެރި ކަމަށެވެ.
މިސިސިޕީގެ ގަވަރުނަރު ޓޭޓް ރީވްސް ވިދާޅުވީ ރެސްކިއު ޓީމުތަކުން ގެއްލުނު މީހުން ހޯދަން މަސައްކަތް ކުރާ އިރު، އަނިޔާވި މީހުންނަށް ސިއްހީ ފަރުވާދެމުންދާ ކަމަށެވެ.
ހޮނިހިރު ދުވަހުގެ ހެނދުނު އެ ސްޓޭޓުގެ އަސަރުކޮށްފައިވާ ހިސާބުތައް ސާފުކުރަން ފެށި އިރު، އޮފިޝަލުން އާއްމުންނަށް އެންގީ ގެއްލުން ލިބިފައިވާ ހިސާބުތަކަށް ނުދިޔުމަށެވެ.
