އިކުއެޑޯގެ ނޫސްވެރިއަކަށް ފޮނުވި ޔޫއެސްބީ ބޮމެއް ނިއުސްރޫމް ތެރޭގައި ގޮވައި، އޭނާއަށް އަނިޔާވެއްޖެ އެވެ.
ލެނިން އާޓިއެޑާއަށް ޕޯސްޓުން ލިބުނު ސިޓީ އުރައިގެ ތެރޭގައި އޮތް ޔޫއެސްބީ ޑްރައިވް ލެޕްޓޮޕަށް ޖެހުމާ އެކު ގޮވި ކަމަށް އޭނާ ބީބީސީއަށް ބުންޏެވެ.
އެ ހާދިސާގައި އޭނާއަށް ކުދި އަނިޔާތައް ލިބުނެވެ. ރިޕޯޓުތައް ބުނާ ގޮތުން އިކުއެޑޯގެ ގިނަ ނޫސްވެރިންތަކަކަށް ދަނީ ޕޯސްޓު މެދުވެރިކޮށް އެފަދަ ގޮވާ ތަކެތި ފޮނުވަމުންނެވެ.
އެ ގައުމުގެ އެޓޯނީ ޖެނެރަލްގެ އޮފީހުން ބުނީ އެކަމާ ގުޅޭ ތަހުގީގެއް ފަށާފައިވާ ކަމަށެވެ. މިހާތަނަށް ޓާގެޓްކުރި މީޑިއާތަކުގެ ނަން ހާމަކޮށްފައެއް ނުވެ އެވެ. އެހެން ނަމަވެސް، ތަފާތު ފަސް ތަނަކަށް ސިޓީ އުރައިގައި ގޮވާ ތަކެތި ފޮނުވާފައިވެ އެވެ.
އިކުއެޑޯގެ ސަރުކާރުން އެކަން ކުށްވެރިކޮށް ބުނީ ހިޔާލު ފާޅުކުރުމުގެ މިނިވަންކަމަކީ ހުރިހާ އެންމެން އިހްތިރާމް ކުރަން ޖެހޭ ހައްގެއް ކަމަށެވެ.
"ހިޔާލު ފާޅުކުރުމުގެ މިނިވަންކަމާއި ނޫސްވެރިކަމަށް ހުރަސް އަޅަން ހިންގާ ކޮންމެ ކަމަކާ މެދު ވެސް ގާނޫނުގެ ތެރެއިން އެންމެ ބޮޑު އަދަބު ދޭން ޖެހޭ،" ސަރުކާރުގެ ބަޔާނުގައި ބުންޏެވެ.
އިންޓީރިއާ މިނިސްޓަރު ހުއާން ޒަޕާޓާ ވިދާޅުވީ ހުރިހާ ޑިވައިސްތަކެއް ވެސް ޕޯސްޓު ކުރީ އެއް އަވަށަކުން ކަމަށެވެ.
ލެނިން އާޓިއޭޑާއަށް އަނިޔާވި އިރު، އެހެން ނޫސްވެރިންނަށް ފޮނުވި ޑިވައިސްތައް ނުގޮވަ އެވެ. އަދި ބައެއް ނޫސްވެރިން ސިޓީއުރަ ނުހުޅުވަ އެވެ.
ޓީސީ ޓެލެވިޝަންއަށް ފޮނުވި ޑިވައިސްއެއް ނުގޮވާ ގޮތް ހެދުމަށް ފުލުހުން ހާއްސަ އޮޕަރޭޝަނެއް ވެސް ހިންގި އެވެ. އިކުއެޑޯގެ ފޮރެންސިކް ސައިންސްއާ ބެހޭ ޗީފް ވިދާޅުވީ އެ ޑިވައިސްތަކުގައި ހިމެނެނީ "އަސްކަރީ ގްރޭޑު"ގެ ގޮވާ ތަކެތި ކަމަށެވެ.
އިކުއެޑޯގައި ހަމަނުޖެހުން އިތުރުވަމުންދާ މި ދަނޑިވަޅުގައި ރައީސް ގުއިލާމޯ ލާސޯ ވިދާޅުވީ އެއީ ގޭންގުތަކުގެ މެދުގައި އޮންނަ ވާދަވެރިކަމުގެ ނަތީޖާ ކަމަށެވެ.
އެ ގައުމުގައި ފަހަކަށް އައިސް ގޭންގު ކުށްތަކާއި މީހުން މެރުން ވަރަށް ބޮޑަށް އިތުރެވެ. އިކުއެޑޯއަކީ ޕެރޫ އާއި ކޮލޮމްބިއާއަށް މަސްތުވާތަަކެތި ފޮނުވުމަށް ބޭނުންކުރާ ޓްރާންސިޓް ގައުމެކެވެ.
