ކޮވިޑުގެ ހަގީގަތާ ގުޅޭ ސިއްރު މައުލޫމާތު ހާމަކުރަން މަޖުބޫރުވާ ބިލެއް އެމެރިކާގެ ރައީސް ޖޯ ބައިޑެން ތަސްދީގު ކުރައްވައިފި އެވެ.
ހޯމަ ދުވަހު ގާނޫނަކަށްވި ބިލުގެ ދަށުން ސިއްރު މައުލޫމާތު އާއްމުކުރަން ނޭޝަނަލް އިންޓެލިޖެންސް ބިޔުރޯގެ ޑިރެކްޓަރު އެވްރިލް ހެއިންސްއަށް މަޖުބޫރުވެ އެވެ.
ބައިޑެން ވިދާޅުވީ ކޮވިޑުގެ ހަގީގަތާ ގުޅޭ ވީހާވެސް ގިނަ މައުލޫމާތެއް އާއްމުކުރަން ބޭނުންވާ ކަމަށެވެ. ކޮންގްރެސްގެ ހުރިހާ މެމްބަރުން ވެސް ބޭނުންވަނީ އެގޮތެވެ.
އެހެން ނަމަވެސް މައުލޫމާތު ހާމަކުރާ އިރު ގައުމީ ސަލާމަތާ މެދު ވިސްނާނެ ކަމަށް ބައިޑެން ނެރުއްވި ބަޔާނެއްގައި ވިދާޅުވި އެވެ.
އެމެރިކާގެ ޕާލަމެންޓު ނުވަތަ ކޮންގްރެސްގެ މަތިގެ އާއި ތިރިގެއިން ވެސް އެ ބިލް ފާސްކުރީ ހުރިހާ މެމްބަރުންގެ ތާއީދާ އެކު އެވެ.
ކޮވިޑުގެ ފުރަތަމަ ކޭސްތައް ފެނުނީ 2019 ވަނަ އަހަރުގެ ފަހުކޮޅު ޗައިނާގެ ވޫހާން ސިޓީއިންނެވެ. އެ ބަލި އިންސާނުންނާ ހަމައަށް ފޯރި ގޮތާ މެދު އެމެރިކާއިން ގިނަ ވިސްނުންތަކެއް ގެންގުޅެ އެވެ.
އެ ބަހުސް އަނެއްކާވެސް ހޫނުވީ މިދިޔަ މަހު ވޯލް ސްޓްރީޓް ޖާނަލް ނޫހުގައި ޝާއިއުކުރި ހަބަރަކާ ގުޅިގެންނެވެ. އެ ނޫހުން އެމެރިކާގެ ހަކަތައާ ބެހޭ ޑިޕާޓްމަންޓާ ހަވާލާދީ ބުނީ ކޮވިޑު ފަތުރާ ވައިރަސް ޗައިނާގެ ލެބޯޓަރީއަކުން ލީކުވެފައިވުން އެކަށީގެންވާ ކަމަށެވެ.
އެކަމަކު އެއީ ޗައިނާއިން ދޮގުކުރާ ތުހުމަތެކެވެ. އަދި ކޮވިޑުގެ ހަގީގަތާ ގުޅޭ ގޮތުން އެމެރިކާގެ ޖާސޫސީ އިދާރާތަކަށް އެއް ވިސްނުމަކަށް އާދެވިފައެއް ނުވެ އެވެ.
