ކުރީގެ ރައީސް އަބްދުﷲ ޔާމީން ދޫކޮށްލުމަށް ގޮވާލައި އިދިކޮޅުން ކުރަމުންދާ ސިލްސިލާ މުޒާހަރާގެ ތެރެއިން ބުރާސްފަތި ދުވަހުގެ ރޭ ފުލުހުން ހައްޔަރުކުރި "އަވަސް" ނޫހުގެ ވީޑިއޯ ޖާނަލިސްޓް ހުސެއިން ޖުމާނާމެދު އަމަލުކުރިގޮތް ފުލުހުން ދިފާއުކޮށްފި އެވެ.
ފުލުހުން މިއަދު ކުރި ޓުވީޓެއްގައި ބުނީ ޖުމާން ހައްޔަރުކުރީ މުޒާހަރާގެ ތެރެއިން މީހަކު ފުލުހުންގެ ބެލުމުގެ ދަށަށް ގެނައުމަށް މަސައްކަތްކުރި ވަގުތު އޭނާ އެކަމަށް ހުރަސްއަޅައި ފުލުހެއްގެ ގައިގައި ޖަހާފައިވާ މައްސަލައާ ގުޅިގެން ކަމަށެވެ.
އަދި އޭނާގެ ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ގެންދިއުމުން އޭނާ ދޫކޮށްލާފައިވާ ކަމަށާއި މި މައްސަލަ ފުލުހުން އިތުރަށް ތަހުގީގު ކުރަމުން ގެންދާ ކަމަށްވެސް ވަނީ ބުނެފަ އެވެ.
ޖުމާން ހައްޔަރުކުރުމާ ގުޅިގެން އިދިކޮޅުން ވަނީ ސަރުކާރާއި ފުލުހުންނަށް ވަރަށް ބޮޑަށް ފާޑުކިޔާފަ އެވެ. އެގޮތުން މިއީ ނޫސްވެރިންނަށް ފުލުހުން ތަކުރާރުކޮށް ދެމުންދާ އަނިޔާތަކުގެ ތެރެއިން އަނިޔާއެއް ކަމަށްވެސް އިދިކޮޅުގެ އިސް ބޭފުޅުން ވަނީ ވިދާޅުވެފަ އެވެ.
މީގެއިތުރުން ޖުމާން ހައްޔަރުކުރުމާ ގުޅިގެން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިންވެސް ވަނީ ކަންބޮޑުވުން ފާޅުކޮށް ބަޔާނެއް ނެރެފަ އެވެ. އެގޮތުން އެ ޖަމިއްޔާގެ ބަޔާނުގައި ބުނެފައިވަނީ ނޫސްވެރިންނަށް މުޒާހަރާތަކުން އެކި ވަރުގެ އަނިޔާ ލިބެމުންދާ ކަމަށާއި މިފަދަ މައްސަލަތައް މި އަހަރު އިތުރުވެފައިވާ ކަމަށެވެ.
