ރަޝިއާގެ ޖެޓުތަކެއް ޖެހި އެމެރިކާގެ ޑްރޯންއެއް ބްލެކް ސީއަށް ވެއްޓުނީ ރަޝިއާގެ ފަރުވާ ކުޑަކަމުގެ ސަބަބުން ކަމަށް އެމެރިކާއިން ތުހުމަތުކޮށްފި އެވެ.
ރިޕޯޓުތައް ބުނާ ގޮތުން އެ ހާދިސާ ހިނގުމުގެ ކުރިން ޑްރޯން ދަތުރު ކުރަމުން ދިޔަ ރޫޓަށް ރަޝިއާގެ ޖެޓުތަކުން ތެޔޮ އެޅި އެވެ. އެމެރިކާއިން ބުނީ އެއީ ބައިނަލްއަގްވާމީ ވައިގެ ސަރަހައްދު ކަމަށެވެ.
އެމެރިކާއިން ނެރުނު ބަޔާނުގައި ބުނީ ރަޝިއާގެ ޖެޓުތަކުން "އެއްވެސް ބެއްލުމެއް ނެތި، ފަރުވާކުޑަކޮށް އަދި ތިމާވެއްޓަށް ވެސް ބެލުމެއް ނެތި،" ތެޔޮ އެޅީ ޑްރޯން މަައްޗަށް ކަމަށެވެ.
އެމެރިކާއިން ބުނީ އެމްކީ-9 ރީޕާ ޑްރޯން ބްލެކް ސީއަށް ވެއްޓުނީ އަންގާރަ ދުވަހު ރަޝިއާގެ ޖެޓުތަކާ 40-30 މިނެޓުގެ ކުރިމަތިލުމަކަށް ފަހުގައި ކަމަށެވެ.
އެމެރިކާގެ ޑްރޯން އެ ސަރަހައްދުގައި އުޅުނީ "ރޫޓީން އޮޕަރޭޝަންތަކެއް" ހިންގުމަށް ކަމަށް އެ ގައުމުން ބުންޏެވެ. ރީޕާ ޑްރޯންއަކީ 20 މީޓަރު ފުޅާ ސާވައިލެންސް އުޅަނދެކެވެ.
އެހެން ނަމަވެސް ރަޝިއާގެ ސޫ-27 ދެ ހަނގުރާމަ މަތީ ޖެޓާއި އެމެރިކާގެ ޑްރޯން ނުޖެހޭ ކަމަށް ރަޝިއާއިން ބުނެ އެވެ.
ރަޝިއާގެ ޑިފެންސް މިނިސްޓްރީން ބުނީ އެމެރިކާާގެ ޑްރޯން ދުއްވަމުން ދިޔައީ އޭގެ ޓްރާންސްޕޮންޑާ ނިއްވާލައިގެން ކަމަށާއި އޭތި ވެއްޓުނީ ދުއްވި ގޮތުގެ ސަބަބުން ކަމަށެވެ.
ޓްރާންސްޕޮންޑާއަކީ ވައިގެ އުޅަނދުގައި ހުންނަ ކޮމިއުނިކޭޝަން ޑިވައިސްއެކެވެ. އެއީ އުޅަނދު ޓްރެކް ކުރުމަށް އެހީވެދޭ އެއްޗެކެވެ.
އެނެލިސްޓުން ބުނީ މި ހާދިސާއިން ވެސް ދައްކުވައިދެނީ ޔޫކްރެއިން ހަނގުރާމައިގެ ސަބަބުން އެމެރިކާ އާއި ރަޝިއާގެ ސީދާ ކުރިމަތިލުމެއް އުފެދުމުގެ ނުރައްކާ ކަމަށެވެ.
އެ ހާދިސާއަށް ފަހު އެމެރިކާއިން ވަނީ ރަޝިއާގެ ސަފީރު އެނެޓޮލީ އެންޓޮނޯވް އެ ގައުމުގެ ސްޓޭޓް ޑިޕާޓްމަންޓަށް ހާޒިރުކޮށް ރަސްމީކޮށް މައްސަލަ ޖައްސައިފަ އެވެ.
