ގއ. ފަރެސްމާތޮޑާގައި މި ސަރުކާރުން ތަރައްގީކުރި އެއާޕޯޓަށް ފުރަތަމަ ޖައްސާ ޓެސްޓު ފްލައިޓު މިއަދު ހަވީރު ޖައްސާނެ ކަމަށް މޯލްޑިވިއަން އިން ބުނެފި އެވެ.
މޯލްޑިވިއަންގެ މީޑިއާ އޮފިޝަލް "އަދަދު" އަށް ވިދާޅުވި ގޮތުގައި އެ އެއާޕޯޓުގައި ފުރަތަމަ ފްލައިޓު ޖައްސާނީ މިއަދު ހަވީރު 5:00 ހާއިރު އެވެ.
ޓެސްޓު ފްލައިޓު ޖެއްސުން މިއަދު އޮތް ނަމަވެސް އެ އެއާޕޯޓު ރަސްމީކޮށް ހުޅުވާ ދަތުރުތައް ފަށަން ހަމަޖެހިފައިވަނީ މި ހަފުތާގެ ތެރޭގަ އެވެ. އެގޮތުން މި މަހު 15 ގައި އެއާޕޯޓު ރަސްމީކޮށް ހުޅުވާއިރު، ހަފުތާއަކު ދެ ދަތުރުގެ މަގުން ދަތުރުތައް ފަށާނީ މި މަހު 16 އެވެ.
ފަރެސްމާތޮޑާ އެއާޕޯޓު ހުޅުވުން ފާހަގަކުރުމަށް ގައުމީ އެއާލައިނުން ވަނީ މި މަހުގެ 16 އަދި 19 ގައި އެ އެއާޕޯޓަށް ދަތުރުކުރާ ފަރާތްތަކަށް ހާއްސަ ފެއާއެއް ކަނޑައަޅާފަ އެވެ. އެގޮތުން އެ ދެ ދުވަހު އެ އެއާޕޯޓަށް އެއްކޮޅު ޓިކެޓެއް ލިބޭނީ އާންމު އަގަށްވުރެ 50ރ. ކުޑަކޮށް 1574ރ. އަށެވެ.
ގާތްގަނޑަކަށް 145 މިލިއަން ރުފިޔާ ހޭދަވި މި މަޝްރޫއު ސަރުކާރުން އިއުލާންކޮށް ފެށީ 2020 ގަ އެވެ. އެގޮތުން އެމްޓީސީސީއާ ހަވާލުކޮށްގެން މަސައްކަތް ފެށީ އެއް އަހަރާއި އަށް މަހުން މަސައްކަތް ނިންމާ އެއާޕޯޓު ހުޅުވުމަށެވެ.
ނަމަވެސް ދުނިޔޭގެ ބާޒާރަށް އައި ދަތިތަކާއެކު ތަކެތި ލިބުން ދަތިވެ އެއާޕޯޓުގެ ބައެއް މަސައްކަތްތައް ލަސްވެގެންދިޔަކަން އެމްޓީސީސީއިން ވަނީ މީގެ ކުރިން ފާހަގަކޮށްފަ އެވެ.
