ސަރުކާރުން ތަރައްގީކުރަމުން އަންނަ އެއާޕޯޓުތަކަށް ހިނގާނެ ހަރަދު ހިއްސާކޮށްދޭން ފިނޭންސް މިނިސްޓްރީގައި އެދުމުން ކުރި ސުވާލުތަކަށް ޖަވާބު ނުދީ، ޖުމްލަ ހަރަދުކުރި ކަމަށް ބުނެ ގޯސް އަދަދުތަކެއް އެ މިނިސްޓްރީން ހިއްސާކޮށްފި އެވެ.
ފިނޭންސަށް ހުށަހެޅި އާރުޓީއައިއެއްގައި އަދަދު އިން އެދުނީ މި ސަރުކާރުގެ ޕްލޭނުގެ ދަށުން ހަދާ އެއާޕޯޓުތަކުގެ އަދަދާއި، އެ މަޝްރޫއުތަކުގެ ޖުމްލަ ބަޖެޓާއި ކޮންމެ އެއާޕޯޓަކަށް ހިނގާނެ ހަރަދު ހިއްސާކޮށްދިނުމަށެވެ. ފިނޭންސުން ދިން ޖަވާބުގައި މިއިން އެއްވެސް ސުވާލަކަށް ޖަވާބު ދީފައި ނެތެވެ.
އޭގެ ބަދަލުގައި އެ މިނިސްޓްރީން ދިނީ މިދިޔަ އަހަރާއި މި އަހަރު އެއާޕޯޓުތަކަށް ބަޖެޓު ކުރި ވަރާއި ހަރަދު ކުރި ވަރެވެ. މި އަދަދު ހިއްސާކުރިއިރު އާރުޓީއައިގައި ދިން އަދަދާއި މިނިސްޓްރީން ޝާއިއުކޮށްފައިވާ ވީކްލީ ފިސްކަލް ޑިވެލޮޕްމަންޓް ރިޕޯޓުގައި އޮތް އަދަދާ ހާސްބައި ތަފާތެވެ.
އާރުޓީއައިގައި ފިނޭންސުން ބުނީ މިދިޔަ އަހަރު އެއާޕޯޓުތަކަށް ބަޖެޓު ކުރީ 2.4 ބިލިއަން ރުފިޔާ ކަމަށާއި ހަރަދު ކުރީ 2.8 ބިލިއަން ރުފިޔާ ކަމަށެވެ. ފިސްކަލް ޑިވެލޮޕްމަންޓު ރިޕޯޓުގައި އޮތީ އެއާޕޯޓުތައް ތަރައްގީކުރަން 3.4 ބިލިއަން ރުފިޔާ ހަރަދުކުރި ކަމަށެވެ.
ފިނޭންސުން މި މައުލޫމާތު ނުދިނުމުން އަދަދު އިން ވާނީ ރަސްމީ އެކި މަސްދަރުތަކުން ލިބެން ހުރި މައުލޫމާތު އެއްކޮށްގެން މުއިއްޒު ސަރުކާރުން ޕްލޭންކޮށްފައިވާ އެއާޕޯޓުތަކުގެ ލިސްޓެއް އެކުލަވާލާފަ އެވެ. މި ލިސްޓުގައި 10 އެއާޕޯޓެއް ހިމެނެ އެވެ.
މުއިއްޒު ސަރުކާރުން ތަރައްގީކުރަމުންދާ އެއާޕޯޓުތައް
- ހއ. ދިއްދޫ އެއާޕޯޓު [އެމްއޭސީއެލް]
- ށ. ބިލެތްފަހި އެއާޕޯޓު [އެމްއޭސީއެލް]
- ށ. ކޮމަންޑޫ އެއާޕޯޓު [އެމްއޭސީއެލް]
- ށ. މިލަންދޫ އެއާޕޯޓު [އެމްއޭސީއެލް]
- ނ. ވިހަފަރު އެއާޕޯޓު [އެމްއޭސީއެލް]
- ރ. ފައިނު އެއާޕޯޓު [އެމްޓީސީސީ]
- އއ. މަތިވެރި އެއާޕޯޓު [އެމްއޭސީއެލް]
- ފ. ނިލަންދޫ އެއާޕޯޓު [އެމްއޭސީއެލް]
- ތ. ވިލުފުށި އެއާޕޯޓު [އެމްއޭސީއެލް]
- ތ. ގުރައިދޫ އެއާޕޯޓު [އެމްޓީސީސީ]
- ގއ. ވިލިނގިލި އެއާޕޯޓު
މި އެއާޕޯޓުތަކުގެ އިތުރުން ސޯލިހު ސަރުކާރުގައި މަސައްކަތް ފެށި ހދ. މަކުނުދޫ އެއާޕޯޓާއި ރ. އަލިފުށީ އެއާޕޯޓާއި ފ. މަގޫދޫ އެއާޕޯޓުގެ އިތުރުން ބ. ތުޅާދޫ އެއާޕޯޓުގެ ޕްރޮޖެކްޓުތައް ނިންމައި، އެ އެއާޕޯޓުތައް އޮޕަރޭޝަނަށް ގެންނާނެ ކަމަށް ސަރުކާރުން ބަނީ ބުނެފަ އެވެ.
މި ހުރިހާ އެއާޕޯޓެއްގެ މަސައްކަތް ނިމުމުން ރާއްޖޭގައި އެއާޕޯޓެއް ނޯންނަ އަތޮޅަކަށް އޮންނާނީ ވާވު އަތޮޅު އެކަންޏެވެ.
އާ އެއާޕޯޓުތައް ތަރައްގީކުރުމުގެ މަސައްކަތުގެ އިތުރުން މިހާރު ހުރި ބައެއް ޑޮމެސްޓިކް އެއާޕޯޓުތައް އަޕްގްރޭޑު ކުރުމާއި ލާމު އަތޮޅުގައި ދެވަނަ އެއާޕޯޓެއް ތަރައްގީކުރުމަކީ ވެސް ސަރުކާރުގެ ޕްލޭނުގައި ހިމެނޭ ކަންކަމެވެ.
