މެކްސިކޯގައި އެމެރިކާގެ ރައްޔިތުންތަކެއް ރަހީނުކުރި މައްސަލައިގައި ހިމެނޭ ގޭންގުން އިސްނަގައިގެން އެ އަމަލު ހިންގި ކަމަށް ތުހުމަތު ކުރެވޭ މެމްބަރުން ފުލުހުންނާ ހަވާލުކޮށްފި އެވެ.
ރިޕޯޓުތައް ބުނާ ގޮތުން އެކަން ކުރީ ގަލްފް ކާޓެލްގެ ތެރެއިން އުފެދުނު ސްކޯޕިއަންސް ގްރޫޕްގެ މެމްބަރުންތަކެކެވެ. އެ ގްރޫޕުން ވަނީ މައާފަށް އެދިފަަ އެވެ.
މިދިޔަ ހަފުތާގައި އެމެރިކާގެ ހަތަރު މީހުން ރަހީނުކުރި އިރު، އޭގެ ތެރެއިން ދެ މީހަކު މަރާލި އެވެ. އޮފިޝަލުން ވަނީ އަނެއް ދެ މީހުން ސަލާމަތްކޮށް އެމެރިކާއަށް ގެންގޮސްފަ އެވެ.
މެކްސިކޯގެ ނޫސްތަކުގެ ފުރަތަމަ ސަފުހާގައި ހުކުރު ދުވަހު ޖަހާފައިވާ ފޮޓޯއަކުން ފެންނަނީ ރަހީނު ކުރުމުގެ އަމަލު ހިންގި ކަމަށް ބެލެވޭ ފަސް މީހުންނެވެ.
އެ މީހުން ފުލުހުންނާ ހަވާލުކުރީ ސްކޯޕިއަންސް ގްރޫޕްގެ ސިޓީއަކާ އެކު އެވެ. އޭގައި ބުނެފައި ވަނީ ރަހީނު ކުރުމުގައި ސީދާ ބައިވެރިވި މީހުން ފުލުހުންނާ ހަވާލުކުރަން ނިންމި ކަމަށެވެ.
އެ މީހުން އެ އަމަލު ހިންގީ ގްރޫޕުން އަންގައިގެން ނޫން ކަމަށާއި އެއީ "އެއްވެސް އަހުލާގެއް ނެތި" އެ މީހުން އަމިއްލައަށް ނިންމި ނިންމުމެއް ކަމަށް ސިޓީގައިވެ އެވެ.
އޭގެ އިތުރުން ގްރޫޕްގެ ގަވާއިދަކީ "ކުށެއް ނެތް މީހުންގެ ފުރާނަ ހިމާޔަތް ކުރުން" ކަމަށް ވާ އިރު، އެ ފަސް މީހުން ގަވާއިދާ ހިލާފުވި ކަމަށް ބުންޏެވެ.
އެމެރިކާގެ ހަތަރު މީހުން ރަހީނުކުރީ މާޗް ތިން ވަނަ ދުވަހު މެކްސިކޯގެ ޓަމޯލިޕާސް ސްޓޭޓުގެ މަތަމޯރޯސް ސިޓީއަށް ދަތުރު ކުރަނިކޮށެވެ.
ރަހީނުކުރި މީހުންގެ އާއިލާތަކުން އެމެރިކާގެ މީޑިއާއަށް ބުނީ އެ މީހުން މެކްސިކޯއަށް ދަތުރު ކުރީ ކޮސްމެޓިކް ސާޖަރީ ހެދުމަށް ކަމަށެވެ.
