އިންޑޮނޭޝިއާގެ ޖަކާޓާގައި މިހާރު ކުރިއަށްދާ އޭޝިއަން ރައިފަލް/ޕިސްޓަލް ކަޕް 2023 ގައި ގައުމީ ޝޫޓިން ޓީމްގެ ޒިޔާން ޒިޔާއު ގައުމީ ރެކޯޑެއް އާ ކޮށްފި އެވެ.
މި މަހުގެ 1-10 އަކަށް ޖަކާޓާގައި ކުރިއަށްދާ މުބާރާތުގައި އޭޝިއާގެ 12 ގައުމަކުން 100 އަށް ވުރެ ގިނަ އެތުލީޓުން އަންނަނީ ވާދަކުރަމުންނެވެ.
މިހާތަނަށް ގައުމީ ހަތަރު ރެކޯޑެއް މި މުބާރާތުގައި ރާއްޖޭގެ ޝޫޓިން ޓީމުން ހަދާފައިވާއިރު، ތިން ރެކޯޑު ހަދާފައިވަނީ 10 މީޓަރު އެއާ ރައިފަލް ބައިންނެވެ.
ގައުމީ ޝޫޓިން ޓީމުގެ އުއްމީދީ ޝޫޓަރު ލާންްސް ކޯޕްރަލް ޒިޔާން ޒިޔާއު ގައުމީ ރެކޯޑު އާ ކުރީ 10 މީޓަރުގެ އެއާ ޕިސްޓަލްގެ ބައިންނެވެ. ފިރިހެން 10 މީޓަރުގެ އެއާ ޕިސްޓަލް ބައިގައި ވާދަކޮށް ޒިޔާން ރެކޯޑު އާ ކުރީ 569 ގެ ސްކޯ އަކުންނެވެ.
މި ރެކޯޑު އެންމެ ފުރަތަމަ ހެދީ 2019 ވަނަ އަހަރު އޮތް 14 ވަނަ އޭޝިއަން ޝޫޓިން ޗެމްޕިއަންޝިޕްގަ އެވެ. އޭގެ ފަހުން 2019 ގައި ނޭޕާލްގައި އޮތް ސައުތު އޭޝިއަން ގޭމްސްގައި ޒިޔާން ވަނީ ވަނީ އަމިއްލަ ރެކޯޑު އާ ކޮށްފަ އެވެ.
އިންޑިވިޖުއަލް ރެކޯޑުގެ އިތުރުން 10 މީޓަރު އެއާ ޕިސްޓަލް މިކްސް ޓީމު ބައިގެ ގައުމީ ރެކޯޑު ހެދި ޝޫޓަރުންގެ ތެރޭގައި ވެސް ޒިޔާން ހިމެނެ އެވެ.
ޒިޔާން ޒިޔާއު އަކީ މި ވަގުތު ގައުމީ ޝޫޓިން ޓީމްގައި އެންމެ ބޮޑު ކުރިއެރުމެއް ހޯދަމުން އަންނަ ޝޫޓަރެވެ. އޭނާ އަށް ވަނީ ފްރާންސްގެ ޕެރިހުގައި 2024 ވަނަ އަހަރު ބާއްވާ އޮލިމްޕިކްސް އަށް ކޮލިފައިވުމަށް އެހީވުމުގެ ގޮތުން ކުރިއަށްގެންދާ އޮލިމްޕިކް ސްކޮލާޝިޕްގެ ފުރުސަތު ވެސް ލިބިފަ އެވެ.
މިހާރު ޖަކާޓާގައި ކުރިއަށްދާ އޭޝިއަން ރައިފަލް/ޕިސްޓަލް ކަޕް 2023ގައި ރާއްޖެއާ އެކު ވާދަކުރާ ގައުމުތަކަކީ މެލޭޝިއާ، ނޭޕާލް، ގަތަރު، ހޮން ކޮންގް، ސިންގަޕޫރު، ވިއެޓްނާމް، ދެކުނު ކޮރެއާ، ފިލިޕީންސް، ޖަޕާން، ކުވެއިތުގެ އިތުރުން މުބާރާތް ބާއްވާ ގައުމު އިންޑޮނޭޝިއާ އެވެ.
