މެކްސިކޯގައި މިދިޔަ ހަފުތާގައި ރަހީނުކުރި އެމެރިކާގެ ހަތަރު މީހުންގެ ތެރެއިން ދެ މީހުން މަރާލާފައިވާ ކަމަށް އެމެރިކާ އާއި މެކްސިކޯގެ އޮފިޝަލުން ބުނެފި އެވެ.
އެމެރިކާގެ ހަތަރު މީހުން ރަހީނުކުރީ މާޗް ތިން ވަނަ ދުވަހު މެކްސިކޯގެ ޓަމޯލިޕާސް ސްޓޭޓުގެ މަތަމޯރޯސް ސިޓީއަށް ދަތުރު ކުރަނިކޮށެވެ. އެކަން ކުރީ ހަތިޔާރު ހިފައިގެން ތިބި ގްރޫޕަކުންނެވެ.
ރަހީނުކުރި މީހުންގެ އާއިލާތަކުން އެމެރިކާގެ މީޑިއާއަށް ބުނީ އެ މީހުން މެކްސިކޯއަށް ދަތުރު ކުރީ ކޮސްމެޓިކް ސާޖަރީ ހެދުމަށް ކަމަށެވެ.
ރަހީނު ކުރި މީހުންގެ ތެރެއިން ދެ މީހުން މަރާލާފައިވާ އިރު، އަނެއް ދެ މީހުން މިހާރު ތިބީ ރައްކާތެރިކަމާ އެކު އެމެރިކާއަށް ގެންގޮސްފައި ކަމަށް އޮފިޝަލުން ބުނެ އެވެ.
ތުހުމަތު ކުރެވޭ އުމުރުން 24 އަހަރުގެ ހޯޒޭ "އެން" ނަމަކަށް ކިޔާ މީހަކު ވަނީ ހައްޔަރުކޮށްފަ އެވެ.
އެމެރިކާގެ އެފްބީއައިއިން ބުނީ ސަލާމަތް ކުރި ދެ މީހުންނަށް ހޮސްޕިޓަލުގައި ފަރުވާދެމުންދާ ކަމަށާއި އޭގެ ތެރެއިން އެކަކަށް ސީރިއަސް އަނިޔާތަކެއް ލިބިފައިވާ ކަމަށެވެ.
އޭގެ އިތުރުން މަރުވި ޒިންޑެލް ބްރައުން އާއި ޝައީދް ވުޑާޑްގެ ހަށިގަނޑު އަނބުރާ އެމެރިކާއަށް ގެނައުމުގެ މަސައްކަތް ކުރަމުންދާ ކަމަށް ވެސް އޮފިޝަލުން ބުންޏެވެ.
މެކްސިކޯގެ ރައީސް އަންދްރޭސް މެނުއެލް ލޮޕޭޒް އޮބްރާޑޯ މައާފަށް އެދި ވިދާޅުވީ އެފަދަ ކަމެއް ދިމާވީތީ ހިތާމަ ކުރާ ކަމަށާއި އެމެރިކާއަށް ތައުޒިޔާ ފޮނުވާ ކަމަށެވެ.
އޮފިޝަލުން ގަބޫލުކުރާ ގޮތުގައި އެކަމުގެ ފަހަތުގައި އޮތީ ގަލްފް ކާޓެލް އެވެ. އެއީ މެކްސިކޯގައި އެންމެ ގިނަ ދުވަސްވީ އެއް ގޭންގެވެ.
