ވީޑިއޯ ކޮންފެރެންސަށް ހާއްސަ ޕްލެޓްފޯމް ޒޫމްގެ ރައީސް ގްރެގް ޓޫމްބް މަގާމުން ވަކިކޮށްފި އެވެ.
ރިޕޯޓުތައް ބުނާ ގޮތުން ޓޫމްބްގެ އެއްބަސްވުން ކުއްލި ގޮތަކަށް ނިންމާލީ "އެއްވެސް ސަބަބެއް" ނެތި އެވެ.
ކުރިން ގޫގްލްގައި މަސައްކަތް ކުރި ޓޫމްބް ޒޫމްގެ ރައީސްކަމަށް އަައީ ޖޫން 2022 ގަ އެވެ. ކުންފުނީގެ ތަރުޖަމާނަކު ބުނީ އާ ރައީސަކު ހޯދުމުގެ މަސައްކަތް ކުރިއަށް ނުދާ ކަމަށެވެ.
ޓޫމްބް މަސައްކަތް ކުރީ ސީއީއޯ އެރިކް ޔުއާންގެ ދަށުންނެވެ. އޭނާއަކީ 2011 ވަނަ އަހަރު ޒޫމް ކުންފުނި ފެށި މީހާ އެވެ.
އޭގެ ފަަހުން ކޮވިޑް ބަލިމަޑުކަމުގެ ތެރެއިން ޒޫމްއަށް ބޮޑު މަގުބޫލުކަމެއް ލިބުނެވެ. ޒޫމް މެދުވެރިކޮށް ކައިވެންޏާއި ޖަނާޒާ ވެސް ބާއްވަމުން ދިޔަ އެވެ.
އެހެން ނަމަވެސް، ވީޑިއޯ ކޮންފެރެންސިން ބޭނުން ކުރާ މިންވަރު މިހާރު މަދުވުމުން ކުންފުންޏަށް ގޮންޖެހުންތައް ގިނަ އެވެ.
ބަލިމަޑުކަމުގެ ތެރޭގައި ކުންފުނީގެ މުވައްޒަފުންގެ އަދަދު ތިން ގުނަ އިތުރުވި ނަމަވެސް ފެބްރުއަރީ މަހު ކުންފުނީގެ 15 ޕަސެންޓް ނުވަތަ 1300 މުވައްޒަފުން ވަޒީފާއިން ވަކިކުރި އެވެ.
