އެމެރިކާގެ ރަައީސް ޖޯ ބައިޑެންގެ ހަށިގަނޑުން ކެންސަރަށް މަގުފަހިވާ ޓިޝޫތަކެއް މިދިޔަ މަހު ނަގާފައިވާ ކަމަށް ވައިޓް ހައުސްއިން ބުނެފި އެވެ.
ބައިޑެންގެ ޑޮކްޓަރާ ހަވާލަދީ ވައިޓް ހައުސްއިން ބުނީ ޝައްކު ކުރެވޭ ހުރިހާ ޓިޝޫއެއް ހަންގަނޑުން ނެގި ކަމަށާއި އިތުރު ފަރުވާއެއް ކުރަން ނުޖެހޭނެ ކަމަށެވެ.
ނަމަވެސް، މީގެ ފަހުން ގަވާއިދުން ބައިޑެންގެ ހަންގަނޑު މޮނީޓާ ކުރަމުން ދާނެ ކަމަށް ޑޮކްޓަރުންނާ ހަވާލަދީ ވައިޓް ހައުސްއިން ބުންޏެވެ.
ބައިޑެންގެ ހަށިގަނޑުން ފެނުނީ ބޭސަލް ސެލް ކާސިނޯމާ ބާވަތުގެ ކެންސަރެވެ. އެއީ އާއްމު ގޮތެއްގައި ނުފެތުރޭ ނުވަތަ "މެޓަސްޓައިޒް" ނުވާ ބާވަތެކެވެ.
އުމުރުން 80 އަހަރުގެ ބަައިޑެންގެ ފިޒިކަލް ޓެސްޓުތައް ފެބްރުއަރީ މަހު ހެދި އިރު، ޒިންމާތައް އަދާކުރެވޭ ވަރަށް ހަށިގަނޑު ދުޅަހެޔޮ ކަމަށް ވައިޓް ހައުސްއިން ބުންޏެވެ.
ޖެނުއަރީ މަހު ބައިޑެންގެ އަނބިކަނބަލުން ޖިލް ބައިޑެންގެ ހަންގަނޑުން ވެސް ޓިޝޫ ނެގި އެވެ. އޭގެ ތެރޭގަައި ކެންސަރަށް މަގުފަހިވާ ޓިޝޫ ހިމެނެ އެވެ.
ބައިޑެން ރައީސް ކަމަށް ވަޑަައިގެންނެވުމުގެ ކުރިން ވެސް ކެންސަރަށް މަގުފަހިވާ ޓިޝޫ ހަންގަނޑުން ނަގާފައިވެ އެވެ. ޖިލް އާއި ބައިޑެންގެ ފިރިހެން ދަރިފުޅު، ބިޔު 2015 ވަނަ އަހަރު ނިޔާވީ ސިކުނޑީގެ ކެންސަރުގަ އެވެ.
