އެމެރިކާގެ މުއްސަނދި ގާނޫނީ ވަކީލެއް އޭނާގެ އަންހެނުންނާއި ފިރިހެން ދަރިއެއް މަރާލުމުގެ ކުށް ސާބިތުވެ އުމުރަށް ޖަލަށް ހުކުމްކޮށްފި އެވެ.
ސައުތު ކެރޮލައިނާ ސްޓޭޓުގައި ޝަަރީއަތް ކުރުމަށް ފަހު އުމުރުން 54 އަހަރުގެ އެލެކްސް މާޑޯގެ ކުށް ސާބިތުވާ ކަމަށް ޖޫރީއިން ނިންމީ ބުރާސްފަތި ދުވަހު އެވެ.
ހުކުރު ދުވަހު އޭނާ އުމުރަށް ޖަލަށް ހުކުމް ކުރީ އުމުރުން 52 އަހަރުގައި އަންހެނުން މެގީ އަދި 22 އަހަރުގެ ދަރިފުޅު ޕޯލްގެ ގަޔަށް 2021 ވަނަ އަހަރު ބަޑި ޖަހައި މެރުމުގެ ކުށުގަ އެވެ.
ޕްރޮސެކިއުޓަރުން ބުނީ އަންހެނުންނާއި ދަރިފުޅު މަރާލީ މާޑޯ ހިންގަމުން ދިޔަ މާލީ ކުށްތަކަށް ސަމާލުކަން ލިބެން ފެށުމުން ހަމްދަރުދީ ހޯދައި، ތަހުގީގު އަނބުރާލުމަށް ކަމަށެވެ.
އެލެކްސް މާޑޯ ނިސްބަތްވަނީ މީގެ އަހަރުތަކެއް ކުރިން ވަރުގަދަ ގާނޫނީ ކުންފުންޏެއް އުފެއްދި މުއްސަނދި އާއިލާއަކަށެވެ. އެ އާއިލާގެ ގިނަ ބިންތަކެއް ހުރި އިރު، ބާރާއި ނުފޫޒު ވެސް އޮތެވެ.
ޝަރީއަތުގެ ތެރެއިން އެނގުނު ގޮތުގައި މާޑޯ ވަނީ ކްލަޔަންޓުންނަށް އޮޅުވާލައިގެން ނުވަ މިލިއަން ޑޮލަރު ހޯދައިފަ އެވެ. މުއްސަނދި ދިރިއުޅުމެއް އުޅުނު އިރު، އޭނާ ހުރީ ބޭހަކަށް ވެސް ދެވި ހިފައިފަ އެވެ.
ހުކުރު ދުވަހު އަޑުއެހުމުގައި ދެ ފަހަރު ވެސް ވާހަކަދައްކަމުން މާޑޯ ބުނީ އޭނާގެ ކުށެއް ނެތް ކަމަށެވެ. އޭނާގެ ވަކީލުން ބުނީ ހުކުމް އިސްތިއުނާފް ކުރާނެ ކަމަށެވެ.
