އެމެރިކާގެ ޕެންސިލްވޭނިއާގެ އެއާޕޯޓެއްގައި ގޮވާ އެއްޗެއް ގެންގުޅުނު ކަމުގެ ތުހުމަތުގައި ފިރިހެނަކު ހައްޔަރުކޮށްފި އެވެ.
އެފްބީއައި އޭޖެންޓުން ހައްޔަރު ކުރީ އުމުރުން 40 އަހަރުގެ މާކް މަފްލީ އެވެ. އޭނާއަށް ތުހުމަތު ކުރަނީ ފްލޮރިޑާގެ އޯލާންޑޯއަށް ދާން އޮތް ފްލައިޓަށް އެރުމުގެ ކުރިން ފޮށީގެ ތެރެއަށް ގޮވާ އެއްޗެއް ލީ ކަމަށެވެ.
އޭޖެންޓުން ބުނީ އެއާޕޯޓުގެ ލައުޑް ސްޕީކަރުން މާކް މަފްލީގެ ނަން ގޮވަން ފެށުމުން، އޭނާ އެއާޕޯޓުން ފިލި ކަމަށެވެ. ފުލުހުން އޭނާ ހައްޔަރު ކުރީ ހޯމަ ދުވަަހުގެ ހަވީރު އޭނާ ދިރިއުޅޭ ގެއިންނެވެ.
ޓްރާންސްޕޮޓޭޝަން ސެކިއުރިޓީ އެޑްމިނިސްޓްރޭޝަން (ޓީއެސްއޭ) ގެ އޮފިޝަލުން ބުނީ ޝައްކު ކުރެވޭ ޑިވައިސް ފެނުނީ ރޫޓީން ސްކްރީނިންގެ ތެރެއިން ކަމަށެވެ.
އޮފިޝަލުން ބުނީ ލެހައި ވެލީ އިންޓަނޭޝަނަލް އެއާޕޯޓުން ފުރަން އޮތް އެލީޖިއަންޓް އެއާ ފްލައިޓް 201 އަަށް މަފްލީ ޗެކްއިން ވީ ހޯމަ ދުވަހުގެ ހެނދުނު ކަމަށެވެ.
ޝައްކު ކުރެވޭ ޑިވައިސް ފާހަގަވީ އޭގެ ގަޑިއިރެއް ފަހުންނެވެ. އެހެންވެ، އެފްބީއައިގެ ތަޖުރިބާކާރުންނާއި ބޮން ޓެކްނީޝަނެއް ގެނެސް، އެ ޑިވައިސް ޗެކް ކުރަން މަސައްކަތް ކުރި އެވެ.
އެފްބީއައިގެ ޓެކްނީޝަން ޖެރެޑް ވިޓްމިއާ ވިދާޅުވީ ތުހުމަތު ކުރެވޭ މީހާގެ ފޮށީގެ ތެރެއިން ފޮރުވާފައި އޮތް ތިން އިންޗީގެ ކުޑަ ޑިވައިސެއް ފާހަގަވި ކަމަށެވެ. އޭގައި ފިޔުޒާއި ގޮއްވުމަށް ބޭނުންކުރާ މާއްދާ ހުއްޓެވެ.
އޭގެ އިތުރުން ވެސް އެ ފޮށީގައި ބިޔުޓޭން ދަޅަކާއި ލައިޓަރަކާއި ހުދު އެއްޗެއް ހުރި ހޮޅިއަކާއި ވަޔަލެސް ބުރުމާއެއް އަދި ޓޭޕު އޮޅާފައި އޮތް ދެ ސާކިޓް ބްރޭކަރު އޮތެވެ.
އެއާޕޯޓުގެ ސްޕީކަރުން ނަން ގޮވަން ފެށިތާ ފަސް މިނެޓުގެ ތެރޭގައި މަފްލީ އެއާޕޯޓުން ނިކުމެގެންދާ މަންޒަރު ސެކިއުރިޓީ ކެމެރާއަށް އަރާފައިވެ އެވެ.
