ރާއްޖޭން ބޭރުގެ އެކި ގައުމުތަކުގެ ކުންފުނިތަކުން މުދާ ގަނެ އެ މުދަލުގެ އަގު އަދާކުރުމުގެ ގޮތުން ސައްހަ ނޫން ޓެލެގްރަފިކް ޓްރާންސްފާ (ޓީޓީ) ފޮނުވަމުން ދިޔަ މީހަކު ހައްޔަރުކޮށްފި އެވެ.
މަކަރާއި ހީލަތުން އޮޅުވާލައިގެން މުދާ އެތެރެކޮށް، އެ މުދާ ރާއްޖޭގައި ވިއްކާ މަންފާ ހޯދަމުންދާ ކަމުގެ ތުހުމަތުގައި ހައްޔަރުކޮށްފައިވަނީ 37 އަހަރުގެ ދިވެހި ފިރިހެނެކެވެ.
ކޯޓު އަމުރެއްގެ ދަށުން އެ މީހަކު ހައްޔަރުކޮށްފައިވާއިރު، މާލޭގައި އެ މީހާ ދިރިއުޅެމުންދާ ތަން ބަލައިފާސްކޮށްފައިވާ ކަމަށް ފުލުހުން ބުންޏެވެ.
Advertisement
ދިވެހި ފުލުހުންގެ ހިދުމަތުގެ އިކޮނޮމިކް ކްރައިމް ޑިޕާރޓްމަންޓުން ދަނީ އެ މައްސަލަ އިތުރަށް ތަހުގީގު ކުރަމުންނެވެ.
