"ފަހުގެ ތާރީހެއްގައި" ޔޫކްރެއިނަށް ނޭޓޯގެ މެމްބަރުކަން ލިބޭނެ ކަމަށް، އެމެރިކާ އިސްވެ ހިންގާ އަސްކަރީ ކޯލިޝަނުގެ ސެކެޓްރީ ޖެނެރަލް ޖެންސް ސްޓޮލްޓެންބާގް ވިދާޅުވެއްޖެ އެވެ.
ނޭޓޯގެ މެމްބަރުކަން ހޯދަން ޔޫކްރެއިނުން މަސައްކަތް ކުރާތާ އަހަރުތަކެއް ވެއްޖެ އެވެ. ރަޝިއާގެ ސިފައިން ޔޫކްރެއިނަށް އެރުމުން، އެ ގައުމުން ނޭޓޯގައި އެދުނީ ހުށަހެޅުން މުރާޖައާ ކުރުން އަވަސްކޮށްދިނުމަށެވެ.
އޭގެ އިތުރުން ޔޫރަަޕިއަން ޔޫނިއަން (އީޔޫ) ގެ މެމްބަރުކަން ހޯދަން އެދިވެސް ޔޫކްރެއިނުން މިދިޔަ އަހަރު ހުށަހެޅި އެވެ. އީޔޫގެ ކެންޑިޑޭޓް ސްޓެޓަސް ޔޫކްރެއިނަށް ލިބުނީ ޖޫން މަހު އެވެ.
"އަޅުގަނޑުމެންގެ ކޯލިޝަަނުގެ މެމްބަރަކަށް ޔޫކްރެއިން ވާނެ ކަމަށް ނޭޓޯގެ ގައުމުތަކުން އެއްބަސްވޭ. އެކަމަކު އެއީ ފަހުގެ ތާރީހެއްގައި،" ފިންލޭންޑަށް ކުރެއްވި ދަތުރެއްގެ ތެރެއިން ސްޓޮލްޓެންބާގް ވިދާޅުވި އެވެ.
"މި ވަގުތު އޮތް އެންމެ ބޮޑު ސުވާލަކީ މިނިވަން، އިސްތިގްލާލް ގައުމެއްގެ ގޮތުގައި ޔޫކްރެއިނަށް ދެމިއޮވެވޭނެތޯ އުފެދޭ ސުވާލު."
ޔޫކްރެއިނުން ނޭޓޯގެ މެމްބަރުކަން ބޭނުންވި ނަމަވެސް، ރަޝިއާއިން ދެކޭ ގޮތުގައި އެއީ އެ ގައުމަށް ސެކިއުރިޓީ ނުރައްކަލެކެވެ.
ޔޫކްރެއިން ހަނގުރާމަ ފެށުމުން ފިންލޭންޑާއި ސްވިޑަންއިން ވެސް ވަނީ ނޭޓޯގެ ބައިވެރިވުމަށް ހުށަަހަޅައިފަ އެވެ. ފިންލޭންޑުގެ ހުށަހެޅުން އަވަސްކުރަން ޖެހޭތޯ އެ ގައުމުގެ ޕާލަމެންޓުން ދަނީ ބަހުސް ކުރަމުންނެވެ.
އެއްވެސް ގައުމަކަށް ނޭޓޯގެ މެމްބަރުކަން ލިބޭނީ ކޯލިޝަންގައި ހިމެނޭ ހުރިހާ ގައުމެއްގެ ރުހުން ލިބުމުންނެވެ. ތުރުކީ އާއި ހަންގޭރީއިން މިހާތަނަށް ފިންލޭންޑާއި ސްވިޑަންގެ ހުށަހެޅުން ބަލައިގެންފައެއް ނުވެ އެވެ.
