ރާއްޖޭގެ ކަނޑުފަޅުގެ ސަރަހައްދުތައް ބޭނުންކުރާ ގޮތް ބަލައި ތަރުތީބު ކުރުމަށް ކުރިއަށް ގެންދާ 'މެރިން ސްޕާޝަލް ޕްލޭން' އަށް މައުލޫމާތު އެއްކުރުމަށް، ބޭނުންވާ ދިރާސާއެއް ފަށައިފި އެވެ.
ބްލޫ ޕްރޮސްޕެރިޓީ ކޯލިޝަންގައި ހިމެނޭ ނޭޝަނަލް ޖިއޮގްރެފިކް ޕްރިންސްޓީން ސީސް ޓީމާއި ގުޅިގެން ކުރިއަށްގެންދާ ދިރާސާގެ ތިންވަނަ ދިރާސާ ކުރިއަށް ގެންދިޔުމަށް ހަމަޖެހިފައިވަނީ ހުވަދު އަތޮޅާއި، ފުވައްމުލައް އަދި އައްޑޫ ސިޓީގެ ކަނޑުފަޅުތަކާއި ގުޅޭގޮތުންނެވެ. މި އެކްސްޕެޑިޝަންގައި ބޭނުންކުރާނީ "ބްލޫ ފޯސް" ގެ ތިން އުޅަނދު ކަމަށް ނޫ ރާއްޖެ ޓީމުން މައުލޫމާތުދެ އެވެ.
މި މަސައްކަތް އަންނަ މާޗު މަހުގެ 20 ވަނަ ދުވަހާއި ހަމައަށް ކުރިއަށް ގެންދިޔުމަށް ވަނީ ހަމަޖެހިފަ އެވެ.
މި އެކްސްޕެޑިޝަން ނިންމުމަށްފަހު ޓީމުން ސައިންޓިފިކް ރިޕޯޓަކާއި ޑޮކިއުމެންޓަރީއެއް ތައްޔާރުކުރާނެ އެވެ. އެއަށްފަހު އެއްކުރެވޭ މައުލޫމާތުން ރާއްޖޭގެ ކަނޑުފަޅުތައް ބޭނުންކުރާނެ ގޮތުގެ ޕްލޭނަށް ނޫ ރާއްޖެއިން ކުރިން އެއްކުރެވިފައިވާ މައުލޫމާތަށް އިތުރު ފުރިހަމަ ކަމެއް ލިބިގެންދާނެ ކަމަށް އެ ޓީމުން މައުލޫމާތުދެ އެވެ.
އޭގެ އިތުރުން އާންމުންގެ ހިޔާލު ހޯދުމުގެ ގޮތުން އާންމު ބައްދަލުވުންތަކާއި، ކަނޑުފަޅު ބޭނުންކުރާނެ ގޮތުގެ ސާވޭއެއްވެސް ވަނީ ކުރިއަށް ގެންގޮސްފަ އެވެ.
މިފަހަރުގެ އެކްސްޕެޑިޝަންގައި ދިވެހި ސައިންސްވެރިއެއްގެ ގޮތުގައި ނޫރާއްޖޭގެ ސައިންޓިސްޓް މާއިޝާ މުހައްމަދު ވަނީ ބައިވެރިވެފަ އެވެ. މާއިޝާއާއިއެކު ރާއްޖެއާއި ރާއްޖެއިން ބޭރުގެ ތަޖުރިބާކާރު ސައިންސްވެރިން ބައިވެރިވާނެ އެވެ.
މި ދަތުރުގެ ސައިންސްވެރިން ރާއްޖޭގެ ދެކުނުގެ ކަނޑުތަކުގެ ދެނެގަތުމަށް ބެއިޓެޑް ރިމޯޓް އަންޑަވޯޓާ ވީޑިއޯ ސިސްޓަމް (ބްރަވްސް) ޑީޕް ޑްރޮޕް ކެމެރާ ސާވޭ މިކްރީޕެލިއޯ އަދި މައިކްރޯޕްލާސްޓިކް ސާމްޕްލިން ފަދަ އުކުޅުތައް ބޭނުންކުރާނެ ކަމަށް އެޓީމުން ފާހަގަކުރެ އެވެ.
