އެމެރިކާ އިސްވެ އޮވެ ހިންގާ އަސްކަރީ ކޯލިޝަން ނޭޓޯގެ ނިޔުކްލިއާ ގާބިލްކަމާ މެދު ވިސްނުން ނޫން ގޮތެއް ރަޝިއާއަށް ނެތް ކަމަށް އެ ގައުމުގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
"ނޭޓޯގައި އިސްކޮށް އުޅޭ ހުރިގާ ގައުމުތަކެއްގެ މައިގަނޑު ލަނޑުދަނޑިއަކީ އަޅުގަނޑުމެން [ރަޝިއާ] ބަލިކޮށް އަޅުގަނޑުމެންގެ ރައްޔިތުންނަށް ދަތިކުރުން ކަމަށް އިއުލާންކޮށްފައިވާ އިރު، މި ހާލަތުގައި އެ މީހުންނަށް [ނޭޓޯއަށް] ލިބިފައިވާ ނިޔުކްލިއާ ގާބިލްކަމާ މެދު އަޅާނުލައި ތިބެވޭނީ ކިހިނެއް ތޯ؟" ރޮސިޔާ1 ދައުލަތުގެ ޓީވީއަށް ޕުޓިން ވިދާޅުވި އެވެ.
ޕުޓިން ވިދާޅުވީ ހުޅަނގުން ބޭނުންވަނީ ރަޝިއާ ނެތިކޮށްލަން ކަމަށެވެ.
"އެ މީހުންގެ އޮތީ އެންމެ ލަނޑުދަނޑިއެއް. ކުރީގެ ސޯވިއެޓް ޔޫނިއަން ރޫޅާލައި އޭގެ އެންމެ އަސާސް ކަމުގައު ރަޝިއާ ފެޑެރޭޝަން ނެތިކޮށްލުން،" ޕުޓިން ވިދާޅުވި އެވެ.
ޕުޓިން ވިދާޅުވި ގޮތުގައި ހުޅަނގުގެ ގައުމުތަކަކީ ޔޫކްރެއިނުން ހިންގަމުންދާ ޖަރީމާތަކުގައި ނުސީދާކޮށް ބައިވެރިވަމުންދާ ބަޔެކެވެ.
ނޭޓޯގެ ނިޔުކްލިއާ ގާބިލްކަމާ މެދު ވިސްނަން ޖެހޭ ކަމަށް ޕުޓިން ވިދާޅުވި އިރު، މިދިޔަ ހަފުތާގައި ރަޝިއާއިން ވަނީ އެމެރިކާއާ އެކު ސޮއިކޮށްފައި އޮތް ނިޔުކްލިއާ އެއްބަސްވުމަކަށް އަމަލުކުރުން މެދުކަނޑާލަން ނިންމާފަ އެވެ.
އެ ދެ ގައުމުގެ މެދުގައި ތަންފީޒު ކުރަމުން ދިޔަ ހަމައެކަނި ނިޔުކްލިއާ އެއްބަސްވުމުގެ ބޭނުމަކީ ނިޔުކްލިއާ ހަތިޔާރު މަދުކޮށް، ދުނިޔެއަށް އޮތް ނުރައްކާ ކުޑަ ކުރުމެވެ.
