މެކްސިކޯގައި މަސްތުވާތަކެއްޗާ ދެކޮޅު ހަނގުރާމައިގައި ކުރިން އިސްކޮށް އުޅުނު މިނިސްޓަރެއްގެ މައްޗަށް މަސްތުވާތަކެތި ޓްރެފިކް ކުރުމުގެ ކުށް އެމެރިކާގައި ސާބިތުވެއްޖެ އެވެ.
ޖެނާރޯ ގާސިއާ ލޫނާއަކީ މެކްސިކޯގެ ކުރީގެ ސެކިއުރިޓީ މިނިސްޓަރެވެ. އޭނާގެ މައްޗަށް ސާބިތުވީ މެކްސިކޯގައި ކުށް ކުރާ އެންމެ ބޮޑު ގޭންގު، ސިނައޯލާ ކާޓެލްގެ އަތުން އެތައް މިލިއަން ޑޮލަރެއް ނެގި ކަމަށެވެ.
އުމުރުން 54 އަހަރުގެ ގާސިއާ ލޫނާ ހައްޔަރު ކުރީ އެމެރިކާގެ ޓެކްސަސް ސްޓޭޓުން 2019 ވަނަ އަހަރު އެވެ. އޭނާ ވަނީ ތުހުމަތުތައް ދޮގުކޮށްފަަ އެވެ. ކުށް ސާބިތުވުމާ އެކު އޭނާގެ މުޅި އުމުރު ޖަލުގައި ހޭދަކުރަން ޖެހުން އެކަށީގެންވެ އެވެ.
ޑިޕާޓްމަންޓް އޮފް ޖަސްޓިސްއިން ނެރުނު ބަޔާނެއްގައި ބުނީ ގާސިއާ ލޫނާ މަދުވެގެން 20 އަހަރު ޖަލުގައި ހުންނަން ޖެހޭނެ ކަމަށެވެ.
މިނިސްޓަރުކަމުން ވަކިވުމަށް ފަހު ގާސިއާ ލޫނާ ދިރިއުޅުނު ބަދަލުކުރީ އެމެރިކާއަށެވެ. ކުށް ސާބިތުވުމުން މެކްސިކޯގެ ރައީސް އެންދްރޭ މެނުއެލް ލޮޕޭޒް އޮބްރާޑޯ ވަނީ އެމެރިކާއަށް މަރުހަބާ ދަންނަވައި، ކުރީގެ ރައީސް ފިލީޕޭ ކަލްޑެރޯންއަށް ފާޑުވިދާޅުވެފަ އެވެ.
ސެކިއުރިޓީ މިނިސްޓަރުގެ ގޮތުގައި ގާސިއާ ލޫނާ އުޅުނީ ކަލްޑެރޯންގެ ސަރުކާރުގަ އެވެ. މަސްތުވާތަކެއްޗާ ދެކޮޅު ހަނގުރާމައެއް ކަމަށް ބުނެ އޭނާ މަސައްކަތް ފެށީ 2006 ގަ އެވެ.
އެނެލިސްޓުން ބުނާ އޭނާގެ މައްޗަށް ކުށް ސާބިތުވުމުން އެމެރިކާ އާއި މެކްސިކޯގައި ބޮޑެތި ބަދަލުތަކެއް ފެންނާނެ ކަމަށެވެ. އެގޮތުން "ހާމަކަން ބޮޑުކޮށް" ކޮރަޕްޓްވެފައި ތިބި މެކްސިކޯގެ އޮފިޝަލުން ފަސްޖެހޭނެ ކަމަށާއި އެފަދަ އޮފިޝަލުންގެ މައްސަލަތައް ބެލުމަށް ޕްރޮސެކިއުޓަރުންނަށް ހިތްވަރު ލިބޭނެ ކަމަށް ބެލެވެ އެވެ.
ތުހުމަތު ކުރެވޭ ގޮތުގައި ގާސިއާ ލޫނާ ވަނީ ސިނައޯލާ ކާޓެލްއަށް އެހެން ގޭންގުތަކާ ގުޅޭ މަައުލޫމާތު ފޯރުކޮށްދީ، ފުލުހުންގެ އޮޕަރޭޝަންތަކާ ގުޅޭ މައުލޫމާތު ވެސް ފޯރުކޮށްދީފަ އެވެ.
