އެމެރިކާގައި މަދަނީ ހައްގުތަކަށް ޑިމާންޑް ކުރަމުން ދިޔަ އެކްޓިވިސްޓް މެލްކަމް އެކްސް 1965 ވަނަ އަހަރު މަރާލި މައްސަލައިގައި ނިއު ޔޯކް ސިޓީ ޕޮލިސް ޑިޕާޓްމަންޓާއި އެހެން އިދާރާތަކާ ދެކޮޅަށް ކޯޓަށް ދާން އާއިލާއިން ނިންމައިފި އެވެ.
މެލްކަމް އެކްސްގެ ދަރިއެއް ކަމުގައިވާ އިލްޔާސާ ޝަބާޒް ބުނީ ބައްޕަ މަރާލަން ރާވައި، އެ ރޭވުން ތަންފީޒު ކުރިކަން ސާބިތުވާ ހެކި އިދާރާތަކުން ގަސްދުގައި ފޮރުވި ކަމަށެވެ.
މެލްކަމް އެކްސްގެ ގަޔަށް ބަޑި ޖަހައި މަރާލިތާ 58 އަހަރު ފުރުން ފާހަގަކުރަން ބޭއްވި ހަފުލާގެ ތެރެއިން ޝަބާޒް ބުނީ ފުލުހުންގެ އިތުރުން އެފްބީއައި އާއި ސީއައިއޭއާ ދެކޮޅަށް ކޯޓަށް މައްސަލަ ހުށަހަޅާނެ ކަމަށެވެ.
މެލްކަަމް އެކްސް މަރާލި އިރު ޝަބާޒްގެ އުމުރުން އެންމެ ދެ އަހަރެވެ. މިހާރު އޭނާގެ އުމުރުން 60 އަހަރުވެފައިވާ އިރު، ޝަބާޒް ބުނީ ހަގީގަތް ހާމަކުރަން އާއިލާއިން ބޭނުންވާ ކަމަށެވެ.
titledesc
ހާލެމް އޮޑިޓޯރިއަމްގައި ވާހަކަ ދައްކަން ތައްޔާރު ވަނިކޮށް މެލްކަމްސް އެކްސްގެ ގަޔަށް ބަޑި ޖެހީ ހަތިޔާރު ހިފައިގެން ތިބި ތިން ފިރިހެނުންނެވެ. އޭނާގެ ގަޔަށް 21 ފަހަރު ބަޑި ޖެހި އެވެ.
"ހަގީގަތް ހާމަކުރަން އާއިލާއިން މަސައްކަތް ކުރާތާ އެތައް އަހަރެއް ވެއްޖެ،" މެލްކަމް އެކްސްގެ ހަނދާނުގައި މެމޯރިއަލް ސައިޓަކަށް މިހާރު ބަދަލުކޮށްފައިވާ ހާލެމް އޮޑިޓޯރިއަމްގައި ހުރެ ޝަބާޒް ބުންޏެވެ.
އާޢިލާގެ ވަކީލު ބެންޖަމިން ކްރަމްޕް ބުނީ މެލްކަމް އެކްސް މަރާލަން ބޭނުންވެ، އެކަން ފެށީ އެމެރިކާ ސަރުކާރުގައި ހިމެނޭ ބާރުގަދަ މީހުން ކަމަށެވެ. އޭނާ ވަކިން ފާހަގަކުރީ އެފްބީއައިގެ ކުރީގެ ޑިރެކްޓަރު ޖޭ އެގާ ހޫވާގެ ނަމެވެ.
އޭނާ ބުނީ މެލްކަމް އެކްސްގެ އާއިލާއިން ބޭނުންވަނީ ބަދަލުގެ ގޮތުގައި 100 މިލިއަން ޑޮލަރު ކަމަށެވެ.
"މިއީ ހަަމައެކަނި ބަޑި ޖެހި މީހުންނާ ގުޅޭ ކަމެއް ނޫން. މިއީ އެކަން ރާވައި، ފިލައި ތިބެ ބަޑި ޖަހަން މީހުން ފޮނުވި ފަރާތްތަކާ ގުޅޭ ކަމެއް."
ނިއު ޔޯކްގެ ފުލުހުންނާއި އެފްބީއައި އަދި ސީއައިއޭއިން ވެސް އެ މައްސަލައިގައި ވަކި އެއްޗެއް ނުބުނެ އެވެ.
