އިތިއޮޕިއާގެ ވެރިރަށް އަދިސް އަބާބާގައި އެފްރިކަން ޔޫނިއަން ސަމިޓު ކުރިއަށް ދަނިކޮށް، ކޮންފެރެންސް ހޯލުގައި އިންނެވި އިޒްރޭލުގެ އިސް ޑިޕްލޮމެޓް އެ ތަނުން ބޭރުކޮށްފި އެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަނީ ގާޑުން އައިސް އިޒްރޭލް ފޮރިން މިނިސްޓްރީގެ ޑެޕިއުޓީ ޑިރެކްޓަރު ޖެނެރަލް ފޯ އެފްރިކާ ޝެރޯން ބާލީ ގޮވައިގެން ދާ މަންޒަރެވެ.
އިޒްރޭލުން ހޮނިހިރު ދުވަހު އެކަމާ މެދު ހިތްހަމަނުޖެހުން ފާޅުކޮށް ބުނީ އެ އަމަލަކީ އަލްޖީރިއާ އާއި ދެކުނު އެފްރިކާގެ އެހީއާ އެކު އިރާނުން ރޭވި އަމަލެއް ކަމަށެވެ.
އިޒްރޭލް ފޮރިން މިނިސްޓްރީން ބުނީ އެއީ "ހަރުކަށި" އަމަލެއް ކަމަށާއި ސަމިޓުގެ އޮބްޒާވާ ސްޓެޓަސް ދީ އެކަން ޔަގީންކުރާ ޓެގް ވެސް ބާލީގެ އަތުގައި އޮތް ކަމަށެވެ.
އެހެން ނަމަވެސް އެފްރިކަން ޔޫނިއަންގެ އޮފިޝަލުން ބުނީ އެއީ ދޮގެއް ކަމަށެވެ. އޮފިޝަލުން ބުނީ ސަމިޓުގައި ބައިވެރިވުމުގެ ދައުވަތު ބާލީއަށް ނުދޭ ކަމަށެވެ.
ގާޑުން ފޮނުވައި ހޯލުން ނެރުމުގެ ކުރިން، އަމިއްލައަށް އެ ތަނުން ދިޔުމަށް ތަކުރާރުކޮށް އެންގި ކަމަށް ވެސް އޮފިޝަލުން ބުންޏެވެ. އެފްރިކަން ޔޫނިއަނުން ސަމިޓުގެ ދައުވަތު ދިނީ ސަފީރު އަލޭލީ އަދްމަސޫއަށެވެ.
އަަހަރުތަކެއް ވަންދެން ކުރި މަސައްކަތަށް ފަހު އިޒްރޭލުން އެފްރިކަން ޔޫނިއަންގެ އޮބްޒާވާ ސްޓެޓަސް ހޯދީ 2021 ގަ އެވެ. އެކަމާ އެންމެ ނުރުހުން ފާޅުކުރީ އަލްޖީރިއާ އަދި ދެކުނު އެފްރިކާ އެވެ.
އެ ދެ ގައުމުން ބުނީ އެފްރިކާގެ ގައުމުތަކަކީ އަބަދުވެސް ފަލަސްތީނުގެ ހައްގުގައި ވަކާލާތު ކުރާ ގައުމުތަކަށްވާ އިރު، އިޒްރޭލް ބަލައިގަންނަ ފަދަ އެއްވެސް ނިންމުމެއް ނުނިންމޭނެ ކަމަށެވެ.
