ޔޫކްރެއިންގައި ރަޝިއާއިން އިންސާނިއްޔަތާ ދެކޮޅު ޖަރީމާ ހިންގާފައިވާ ކަމަށް އެމެރިކާއިން "ރަސްމީކޮށް ކަނޑައަޅައިފި" ކަމަށް އެމެރިކާގެ ނައިބު ރައީސް ކަމަލާ ހެރިސް ވިދާޅުވެއްޖެ އެވެ.
މިޔުނިކް ސެކިއުރިޓީ ކޮންފެރެންސްގައި ވާހަކަ ދައްކަވަމުން ހެރިސް ރަޝިއާއިން ތުހުމަތު ކުރެއްވީ "މީހުން މެރުމާއި، ލާއިންސާނީ އަނިޔާ އާއި ރޭޕް އަދި ޑީޕޯޓްކުރުން" ފަދަ އަމަލު ހިންގާ ކަމަށެވެ.
ކުށްތައް ހިންގަމުންދާ މީހުން އިންސާފުގެ ކުރި މައްޗަށް ގެންނަން ޖެހޭނެ ކަމަށާއި އެ އަމަލުތަކަކީ "އާއްމު އުސޫލްތަކާއި އާއްމު އިންސާނިއްޔަތާ ހިލާފު" އަމަލުތަކެއް ކަމަށް ހެރިސް ވިދާޅުވި އެވެ.
އެ ކޮންފެރެންސްގައި ބައިވެރިވެވަޑައިގެންނެވި ދުނިޔޭގެ ވެރިން ގޮވާލެއްވީ ދިގު މުއްދަތަކަށް ޔޫކްރެއިނަށް އެހީ ފޯރުކޮށްދިނުމަށެވެ.
އިނގިރޭސި ބޮޑު ވަޒީރު ރިޝީ ސުނަކް ވިދާޅުވީ މިއީ ޔޫކްރެއިނަށް ފޯރުކޮށްދޭ އަސްކަރީ އެހީ ދެ ގުނަ އިތުރު ކުރަންވީ ވަގުތު ކަމަށެވެ.
ސެކިއުރިޓީއާ ގުޅޭ ބައިނަލްއަގްވާމީ ކޮންފެރެންސް ޖަރުމަނުގައި ފެށި އިރު، ރަޝިއާ އާއި ޔޫކްރެއިންއާ ދެމެދު ކުރަމުންދާ ހަނގުރާމައަށް ފެބްރުއަރީ 24 ވަނަ ދުވަހު އެއް އަހަރު ފުރޭނެ އެވެ.
އިންސާނިއްޔަތާ ދެކޮޅު ޖަރީމާއެއް ކަމަށް އދ. އިން ބަލަނީ "ފުޅާކޮށް އަަދި ރޭވުންތެރިކަމާ އެކު" އާއްމުންގެ ބަޔަކާ ދެކޮޅަށް ހަމަލާ ދިނުމަށެވެ.
ޔޫކްރެއިން ހަނގުރާމައިގައި އާއްމު ރައްޔިތުންނަށް ހަމަލާ ދޭ ކަމަށް ކުރާ ތުހުމަތުތައް ރަޝިއާއިން ދޮގުކުރެ އެވެ.
