ތުރުކީއަށް ބިންހެލުން އައިތާ 11 ދުވަސް ފަހުން އިމާރާތްތަކުގެ ދަށުން ތިން މީހުން ސަލާމަތްކޮށްފައިވާ ކަމަށް ރިޕޯޓުތައް ބުނެފި އެވެ.
ހާކަން ޔާސިނޮގްލޫ އިމާރާތުގެ ދަށުވެފައި އޮތީ 278 ގަޑިއިރު ވަންދެންނެވެ. އޭނާ ސަލާމަތްވީ ހުކުރު ދުވަހު އެވެ. އޭގެ އިތުރުން މުސްތަފާ އަވްޗީ އަދި އުސްމާން ހަލެބިޔޭ ވެސް ސަލާމަތްވި އެވެ.
"އަޅުގަނޑު ހުރީ އުއްމީދު ދޫކޮށްލައިގެން. މިއީ ހަމަ ހަގީގަތުގައި ވެސް މުއުޖިޒާތެއް،" އުމުރުން 34 އަހަރުގެ އަވްޗީގެ ބައްޕަ ރޮއިޓާޒް ނޫހަށް ބުންޏެވެ.
ބިންހެލުން އައިއިރު އަވްޗީގެ އަންހެން ދަރިފުޅު އުފަންވިތާ މާ ގިނައިރުތަކެއް ނުވެ އެވެ. އޭނާ އިމާރާތުގެ ދަށުގައި ތާށިވި ނަމަވެސް، އަންހެނުންނާއި ތުއްތު ދަރިފުޅު ސަލާމަތްވި އެވެ.
އަވްޗީ އޭނާގެ އަންހެނުންނާއި ތުއްތު ދަރިފުޅާ ބައްދަލުވި ވަގުތު. -- ފޮޓޯ: ގެޓީ އިމޭޖާޒް
އަވްޗީ އޭނާގެ އަންހެނުންނާއި ތުއްތު ދަރިފުޅާ ބައްދަލުވީ ހުކުރު ދުވަހުގެ ރޭގެ ވަގުތެއްގައި ދެކުނު މާސިން ސިޓީގެ ހޮސްޕިޓަލަކުން ކަމަށް ނޫސްތަކުން ރިޕޯޓުކުރެ އެވެ.
ތުރުކީ އާއި ސީރިއާއަށް 7.8 މެގްނިޓިއުޑް ބާރު މިނުގައި އައި ބިންހެލުމުގައި މަރުވި މީހުންގެ އަދަދު 41،000 އަށް އަރާފައިވާ އިރު، އަދިވެސް އެ އަދަދު މަތިވަމުން ދާނެ ކަމަށް ބެލެވެ އެވެ.
ތުރުކީގައި އެހީވުމަށް ހިންގާ އޮޕަރޭޝަނަށް ފަންޑު ކުރުމަށް އެއް ބިލިއަން ޑޮލަރު ހޯދަން އދ. އިން ވެސް ވަނީ ކެމްޕެއިނެއް ލޯންޗުކޮށްފަ އެވެ. އޭގެ އިތުރުން ސީރިއާއށް އިތުރު 400 މިލިއަން ޑޮލަރު ހޯދަން އދ. އިން ދަނީ މަސައްކަތް ކުރަމުންނެވެ.
