އެމެރިކާގައި އަނެއްކާވެސް ހަ އަހަރުގެ ފިރިހެން ކުއްޖަކު ސްކޫލަށް ބަޑިއެއް ގެންދިޔަ މައްސަލަ ފެންމަތިވެ އެ ކުއްޖާގެ މަންމަ ހައްޔަރުކޮށްފި އެވެ.
އެ ހާދިސާ ހިނގީ ވާޖިނިއާ ސްޓޭޓުގެ ނޯފޯކް ސިޓީގެ ލިޓްލް ކްރީކް އެލެމެންޓްރީ ސްކޫލްގަ އެވެ. ފުލުހުންނާ ބަޑި ހަވާލުކުރީ ސްކޫލްގެ މުވައްޒަފުންނެވެ.
އެއްވެސް މީހަކަށް އަނިޔާއެއް ނުލިބުނު ނަމަވެސް، ބަޑިން ހަމަލާ ދޭނެ ކަމަށް ބުނެ ފިރިހެން ކުއްޖާ އިންޒާރު ދިން ކަމަށް އަންހެން ކުއްޖެއްގެ މަންމަ ބުނެފައިވެ އެވެ.
މިދިޔަ މަހު ވެސް ވާޖިނިއާ ސްޓޭޓުގެ ނިއުޕޯޓް ނިއުސް ސިޓީގެ ސްކޫލެއްގައި ހަ އަހަރުގެ ފިރިހެން ކުއްޖަކު ޓީޗަރެއްގެ ގަޔަށް ބަޑިޖެހި އެވެ.
އެ ފަހަރު ސީރިއަސް އަނިޔާތަކެއް ލިބުނީ އުމުރުން 25 އަހަރުގެ ޓީޗަރު އެބީ ޒްވާނާއަށެވެ. އޭނާ ވަނީ ހާދިސާ ހިނގި ރިޗްނެކް އެލެމެންޓްރީ ސްކޫލާ ދެކޮޅަށް ކޯޓަށް މައްސަލަ ހުށަހަޅައިފަ އެވެ.
ޒްވާނާ ބުނީ ސްކޫލުގެ ސެކުއިރިޓީ ރަނގަޅަށް ނުބަލަހައްޓާ ކަމަށާއި ބަޑި އޮތްކަން ތަކުރާރުކޮށް ރިޕޯޓު ކުރުމުން ވެސް ފިޔަވަޅު އަޅާފައި ނުވާ ކަމަށެވެ.
