ހޯމަ ދުވަހު ތުރުކީ އާއި ސީރިއާ ގުޅޭ ސަރަހައްދަށް އައި ބިންހެލުމުގައި ގެއްލުން ލިބުނު ފަރާތްތަކަށް އެހީވުމަށްޓަކައި ސައުދީ އަރަބިއްޔާއިން ހުޅުވާލި ފަންޑަށް މަދު ވަގުތުކޮޅެއްގެ ތެރޭގައި 63 މިލިއަން ރިޔާލް (16.7 މިލިއަން ޑޮލަރު) އެކި ފަރާތްތަކުން ހަދިޔާކޮށްފި އެވެ.
ކިންގް ސަލްމާން ހިއުމަނިޓޭރިއަން އެއިޑް އެންޑް ރިލީފް ސެންޓަރު (ކޭއެސްރީލީފް) އިން ބުދަ ދުވަހު ފެށި ކެމްޕޭނަށް މިހާތަނަށް 176،700 އަށް ވުރެ ގިނަ މީހުން ދީލަތި އެހީ ފޯރުކޮށްދީފައިވެ އެވެ.
މިއީ ސައުދީ ރަސްގެފާނު ސަލްމާނާއި ވަލީއަހުދު އަދި ބޮޑުވަޒީރު މުހައްމަދު ބިން ސަލްމާންގެ އިރުޝާދުގެ ދަށުން ފެށި ކެމްޕެއިނެކެވެ.
ތުރުކީ އާއި ސީރިއާ ގުޅޭ ސަރަހައްދަށް އައި ބިންހެލުމުގައި މަރުވި މީހުންގެ އަދަދު 11،000 އަށްވުރެ މައްޗަށް ވަނީ އަރައިފަ އެވެ.
ތުރުކީގެ ރައީސް ތައްޔިބް އުރްދުގާން ވިދާޅުވީ ބިންހެލުމުގައި އެގައުމުގެ 8،574 މީހުން މިހާތަނަށް މަރުވެފައިވާ ކަމަށެވެ. އޭގެ އިތުރުން ސީރިއާ ސަރުކާރާއި، އެ ގައުމުގައި ހަރަކާތްތެރިވާ ރެސްކިއު ޓީމުތަކުން ދީފައިވާ މައުލޫމާތުތަކުން އެނގޭ ގޮތުގައި ސީރިއާއިން 2،530 އަށްވުރެ ގިނަ މީހުން ބިންހެލުމުގައި މަރުވެފައިވެ އެވެ.
