އިޒްރޭލުން ވެރިވެގަނެގެން އުޅޭ ހުޅަނގު އައްސޭރީގައި ހިންގި އަސްކަރީ އޮޕަރޭޝަނެއްގައި ފަލަސްތީނުގެ ނުވަ މީހުން މަރާލައިފި އެވެ.
ޖެނިން އަވަށުގައި ހިންގި އޮޕަރޭޝަނުގައި މަރާލި މީހުންގެ ތެރޭގައި އުމުރުން 61 އަހަރުގެ އަންހެނަކު ހިމެނެ އެވެ. އިޒްރޭލުން ބުނީ އޮޕަރޭޝަން ހިންގީ ޓެރަރިސްޓުންނާ ދެކޮޅަށް ކަމަށެވެ.
އެއީ އިސްލާމިކް ޖިހާދު ގްރޫޕުގެ ޓެރަރިސްޓުން "ވަރުގަދަ ހަމަލާތަކެއް ރާވާތީ" އެ މީހުން ހައްޔަރު ކުރަން ހިންގި އޮޕަރޭޝަނެއް ކަމަށް ބުންޏެވެ.
ނުވަ މީހުން މަރުވި އިރު، 20 މީހުންނަށް އަނިޔާވި ކަމަށް ފަލަސްތީނުގެ ހެލްތު މިނިސްޓްރީން ބުނެ އެވެ. އޭގެ ތެރެއިން ހަތަރު މީހެއްގެ ހާލު ގޯހެވެ.
ފަލަސްތީނު ސަރުކާރުން ބުނީ އިޒްރޭލުން ހިންގީ "ގަތުލުއާއްމެއް" ކަމަށެވެ. ސަލާމަތީ ކަންކަމުގައި އިޒްރޭލާ ގުޅިގެން މަސައްކަތް ކުރުން ހުއްޓާލަން ފަލަސްތީނު ސަރުކާރުން ނިންމި އެވެ.
ހުޅަނގު އައްސޭރީގައި ފަލަސްތީނުގެ ނުވަ މީހުން މަރާލި އިރު، ގުދުސް ކައިރީ އޮންނަ އަލް ރާމް އަވަށުގައި އިޒްރޭލް ސިފައިން ބަޑި ޖަހައި ފަލަސްތީނުގެ 10 ވަނަ މީހަކު މަރާލި އެވެ.
އެ ތަނުގައި ބަޑިޖެހީ ޖެނިންގައި ހިންގަމުން ދިޔަ އަސްކަރީ އޮޕަރޭޝަނާ ދެކޮޅަށް ގިނަ އަދަދެއްގެ އާއްމުން މުޒާހަރާ ކުރަމުން ދަނިކޮށެވެ.
ޓެރަރިޒަމް ހުއްޓުވަން ކަމަށް ބުނެ އިޒްރޭލް ސިފައިން އޮޕަރޭޝަންތައް ހިންގަން ފެށީ މިދިޔަ އެޕްރީލް މަހު އެވެ. އޭގެ ސަބަބުން ހުޅަނގު އައްސޭރީގައި ނުތަނަވަސްކަން ބޮޑެވެ.
