މިއަހަރު އޮންނަ ރިޔާސީ އިންތިހާބާ ބެހޭ މަސައްކަތްތައް ކުރުމަށް އެކަށީގެންވާ މާހައުލެއް އޮތް އިންތިހާބީ މަރުކަޒެއް ނުލިބިއްޖެ ނަމަ އިންތިހާބުގެ މުއްދަތުތަކަކަށް ބުރޫ އެރުމަކީ އެކަށީގެންވާ ކަމެއް ކަމަށް އިލެކްޝަން ކޮމިޝަން (އީސީ)އިން ބުނެފި އެވެ.
މީގެ ކުރިން އިންތިހާބުތަކާ ގުޅުންހުރި މަސައްކަތްތައް ކުރަމުން ދިޔައީ ބާޖަމާލުއްދީން ސްކޫލުގަ އެވެ. އެހެން ނަމަވެސް އެބިން ހުސްކުރުމަށް ނިންމާ އެތަން ތަޅާލުމުގެ މަސައްކަތް ފެށުމުން މިހާރު އީސީގެ މަސައްކަތައް ބަދަލުކޮށްފައި ވަނީ އެ ކޮމިޝަނުގެ ހެޑު އޮފީހަށެވެ.
އިންތިހާބު ބޭއްވުމަށް ހަމަޖެހިފައިވާ ތާރީހާއި، އަދި އިންތިހާބާ ގުޅިގެން ކުރާ މަސައްކަތްތަކުގެ މައުލޫމާތު ހާމަކުރުމަށް މިއަަދު ބޭއްވި ނޫސްވެރިންގެ ބައްދަލުވުމުގައި ވާހަަކަ ދައްކަވަމުން އީސީގެ ނައިބު ރައީސް އިސްމާއިލް ހަބީބް ވިދާޅުވީ މަސައްްކަތް ކުރާނެ ރަނގަޅު ޖާގައެއް އަދި މާހައުލެއް ނެތި މަސައްކަތްތަކެއް ނުފެށި ލަސްވާނަމަ އިންތިހާބުގެ ތާރީހުތަކަށް ބުރޫ އެރުމަކީ އެކަށީގެންވާކަމެއް ކަމަށެވެ.
"އަޅުގަނޑުމެން މަސައްކަތް ކުރާނެ ޖާގަ އާއި މަސައްްކަތް ކުރާނެ ރަނގަޅު މާހައުލެއް ނެތި މަސައްކަތެއް ފެށުން ލަސްވެއްޖެ ނަމަ ދެންމެ މި ދެންނެވި އިންތިހާބުގެ ތާރީހުތަކަށް ބަދަލު އައުމަކީ އެކަށީގެންވާ ކަމެއް،" ހަބީބް ވިދާޅުވި އެވެ.
އޭނާ ވިދާޅުވީ ހެޑް އޮފީހުގައި ހުރިހާ މަސައްކަތެއް ކުރުމަކީ ދަތި ކަމެއް ކަން ސަރުކާރަށް ހުށަހެޅުމުން، ދިވެހިރާއްޖޭގެ އަޑުގެ ބާ އިމާރާތް އެ މަސައްކަތްތަކަށް ހަމަޖެއްސުމަށް ނިންމުމުގެ މަސައްކަތްތަކެއް ކުރަމުން އަންނަ ކަމަށެވެ.
"އެ އިމާރާތް އަޅުގަނޑުމެންނަށް ލިބޭނެ ކަމަށް ޕީއެސްއެމުންް އަޅުގަނޑުމެންނަށް އަންގާފަ އޮތީ މިއަދު. އެހެން ނަމަވެސް އެކަމުގައި އަދި މާބޮޑު ކުރިއެރުމެއް އޮތް ކަމަކަށް އަޅުގަނޑުމެންނަށް ގަބޫލެއް ނުކުރެވޭ،" ހަބީބް ވިދާޅުވި އެވެ.
ޕީއެސްއެމްގެ އަޑު އިމާރާތް ހަމަޖެހުނު ނަމަވެސް އެތަނަކީ މީގެ ކުރިން ދިގު މުއްދަތަކަށް ބޭނުންކޮށްފައިވާ އިމާރާތަކަށް ވާތީ އެތަން މަރާމާތުވެސް ކުރަން ޖެހޭ ކަމަށް އިލެކްޝަން ކޮމިޝަނުން ވަނީ ހާމަކޮށްފަ އެވެ.
އިންތިހާބުގެ މަސައްކަތްތައް ކުރާނެ މަރުކަޒެއް އަދިވެސް ހަމަނުޖެހޭ ކަމަށް އިލެކްޝަން ކޮމިޝަނުން ބުނެފައިވާއިރު މިއަހަރުގެ ސެޕްޓެމްބަރު ނުވަ ވަނަ ދުވަަހު އިންްތިހާބު ބާއްވާނެ ކަން އެ ކޮމިޝަނުން ވަނީ ހާމަކޮށްފަ އެވެ.
މި އިންތިހާބުގައި ޖުމްލަ 6772 މުވައްޒަފުން ހަރަކާތްތެރިވާނެ އެވެ.
