މޯލްޑިވްސް އިންޓެގްރޭޓަޑް ޓޫރިޒަމް ޑިވެލޮޕްމަންޓް (އެމްއައިޓީޑީސީ) އިން ބާއްވާ ސަވާދީއްތަ ދަތުރުގެ މިއަހަރުގެ އެޑިޝަން މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓުރީ (މަޓީ) އިން އެންޑޯޒްކޮށްފި އެވެ.
ސަވާދީއްތަ ދަތުރަކީ ރިޔަލު ޔޮޓް ފަހަރުގައި ރާއްޖެ އަންނަ ޓޫރިސްޓުންނަށް ރާއްޖޭގެ ރަށްފުށުގެ ދިރިއުޅުން ދައްކާލައި، ސެއިލިން ޓޫރިޒަމް ރާއްޖޭގައި ކުރިއެރުވުމަށް އެމްއައިޓީޑީސީން މިދިޔަ އަހަރު ބާއްވަން ފެށި ޔޮޓު ރެލީ އެކެވެ.
މިއަހަރުގެ ސަވާދީއްތަ ދަތުރު ކުރުމަށް ހަމަޖެހިފައިވަނީ މާރިޗު މަހުގެ އެއްވަނަ ދުވަހުން ފެށިގެން އެ މަހުގެ އަށާރަ ވަނަ ދުވަހާ ހަމައަށެވެ. އެ މުއްދަތުގައި ޖުމްލަ ނުވަ ރަށަކަށް ޔޮޓުތައް ބަނދަރު ކުރުމަށް ވަނީ ނިންމާފަ އެވެ.
މިދިޔަ އަހަރުގެ ސަވާދީއްތަ ދަތުރުގެ ތެރެއިން -- ފޮޓޯ: އެމްއައިޓީޑީސީ
ކޮންމެ އަހަރަކު ވަކި ތީމްއެއް ކަނޑައަޅައިގެން މިދިޔަ އަހަރު ބާއްވަން ފެށި އެ އިވެންޓުގެ ފުރަތަމަ ރެލީގެ ތީމާއި ނަން ދިނީ ބޮޑުތަކުރުފާނަށް ހާއްސަ ކޮށްގެންނެވެ. ފުރަތަމަ ދަތުރުގައި ދަތުރުކުރަން ހަމަޖެއްސި 15 ރަށަކީ ބޮޑުތަކުރުފާނުގެ ހަޔާތުގެ ކަންކަމާއި އާސާރުތައް ހިމެނޭ ރަށްރަށެވެ. އެ ރަށްރަށުގެ ތެރޭގައި މީހުން ދިރިއުޅޭ ރަށްރަށާއި ދިރިނޫޅޭ ރަށްރަށް ވެސް ހިމެނުނެވެ.
ނަމަވެސް ކޮވިޑުގެ ބަލިމަޑުކަމުގެ ސަބަބުން ބައެއް ރަށްރަށް މޮނިޓަރިން އަށް ލުމާ ގުޅިގެން އޭގެތެރެއިން ދެ ރަށެއް އުނި ކުރަން ޖެހުނެވެ.
ފަތުރުވެރިކަމުގެ ސިނާއަތުގެ އެންމެ މައި އެއް ޖަމިއްޔާއިން އެ ދަތުރު އެންޑޯޒް ކުރުމަކީ ވަރަށް ބޮޑު ފުރިހަމަކަމެއް ލިބޭނެ ކަމެއް ކަމަށް އެމްއައިޓީޑީސީގެ މެނޭޖިން ޑިރެކްޓަރު، މުހައްމަދު ރާއިދު ވިދާޅުވެ އެވެ.
އަދި, މިއީ އެމްއައިޓީޑީސީގެ މަސައްކަތްތައް މަޓީ އިން ބަލައިގަންނަ ކަމުގެ އަލިގަދަ ހެތްކެއް ކަމަށާއި އެކަމަށް ވަރަށް ބޮޑަށް ޝުކުރު އަދާ ކުރާ ކަމަށް އޭނާ ވިދާޅުވި އެވެ.
