ދިރާގުގެ އެލީޓް ކްލަބް ޕާޓްނަރުންގެ ދުސިތްޑީ2 ރިސޯޓު، ފޭދޫ ފިނޮޅުގައި އިއްޔެ ހާއްސަ އިވެންޓެއް ބާއްވައިފި އެވެ.
މި އިވެންޓަކީ ދިރާގުގެ އެލީޓް ކްލަބްގެ ކާމިޔާބީގައި މުހިންމު ދައުރެއް އަދާކުރާ ޕާޓްނަރުން ދިރާގަށް ދެމުންދާ އެއްބާރުލުން ފާހަގަކޮށް، އެ ފަރާތްތަކަށް ޝުކުރު އަދާކުރުމަށް ބޭއްވި ހަރަކާތެކެވެ.
މި ހަފްލާގައި އެލީޓް ކްލަބްގެ ޕަރޓްނަރުންނަށް ވަނީ އެ ފަރާތްތަކުން ދެމުންދާ އެހީތެރިކަމުގެ އަގުވަޒަންކުރުމުގެ ގޮތުން ހާއްސަ އެވޯޑެއް ހަވާލުކޮށްފައެވެ. މީގެ އިތުރުން، މި އިވެންޓުގައި އެލީޓް ކްލަބްގެ ކުރިމަގަށް ރޭވިފައި ހުރި މުހިންމު ކަންތައްތަކާއި، ކުރިއަށް އޮތް ތަނުގައި ގެނައުމަށް ނިންމާފައިވާ ބަދަލުތަކުގެ މައުލޫމާތު ވަނީ ޕަރޓްނަރުންނާ ހިއްސާކޮށްފައެވެ. މިހާރުވެސް ރާއްޖޭގެ 100 އަށް ވުރެ ގިނަ ވިޔަފާރިތަކުން އެލީޓް ކްލަބް މެދުވެރިކޮށް ދިރާގުގެ ކަސްޓަމަރުންނަށް އަގުހުރި އެތައް ފުރުސަތުތަކެއް ފޯރުކޮށްދެމުންދެއެވެ.
މި ރަސްމިއްޔާތުގައި ދިރާގުގެ ޗީފް ކޮމަރޝަލް އޮފިސަރު އަލީ ރިޔާޒް ވިދާޅުވީ، 2013 ވަނަ އަހަރުން ފެށިގެން މިއަދާ ހަމައަށް އެލީޓް ކްލަބަކީ ކަސްޓަމަރުންގެ މެދުގައި މިހާ ބޮޑު މަގުބޫލުކަމެއް ހޯދާފައިވާ ޕްރޮގްރާމަކަށް ވެގެން ގޮސްފައިވަނީ ޕަރޓްނަރުންނާ ގުޅިގެން ކުރެވުނު ބުރަ މަސައްކަތްތަކުގެ ސަބަބުން ކަމަށެވެ. އަދި ކަސްޓަމަރުންނަށް ގިނަ އަގުހުރި ފުރުސަތުތަކާއި ތަޖުރިބާތަކެއް ފޯރުކޮށްދިނުމުގައި ޕަރޓްނަރުންގެ ދައުރު އޭނާ ފާހަގަކުރެއްވިއެވެ.
އަލީ ރިޔާޒް އިތުރަށް ވިދާޅުވީ، ދިރާގުގެ އަމާޒަކީ މި ހިދުމަތް ޑިޖިޓަލައިޒްކޮށް، އިތުރަށް ފުރިހަމަކުރުން ކަމަށެވެ. އަދި ޕަރޓްނަރުންނާ ގުޅިގެން އެލީޓް ކްލަބްގެ ހިދުމަތްތައް އިތުރަށް ފުޅާކުރުމަށްފަހު، ދިރާގުގެ ހުރިހާ ކަސްޓަމަރުންނަށް ވެސް މި ތަޖުރިބާގެ ފުރުސަތު ހުޅުވާލުމަށް މަސައްކަތް ކުރަމުންދާ ކަމަށް އޭނާ ވިދާޅުވިއެވެ. މި ފުރުސަތުގައި އެލީޓް ކްލަބްގެ ކާމިޔާބީގައި ބައިވެރިވާ ހުރިހާ ޕަރޓްނަރުންނަށް އޭނާ ވަނީ ހާއްސަ ޝުކުރެއް ދަންނަވާފައެވެ.
ދިރާގު އެލީޓް ކްލަބް ޕްރޮގްރާމަކީ އެ ކުންފުނީގެ ކަސްޓަމަރުންގެ އަގުވަޒަންކޮށް، ތަފާތު އަގުހުރި އޮފަރތަކުގެ އެހީގައި ކަސްޓަމަރުންގެ ދިރިއުޅުން އިތުރަށް ފުރިހަމަކޮށްދިނުމަށް ފަރުމާކޮށްފައިވާ ޕްރޮގްރާމެކެވެ. މި ޕްރޮގްރާމްގެ މައިގަނޑު މަގުސަދަކީ ދިރާގާއި ކަސްޓަމަރުންގެ މެދުގައި އޮތް ގުޅުން އިތުރަށް ވަރުގަދަކުރުމެވެ. ދިރާގުން އަބަދުވެސް މަސައްކަތް ކުރަމުންދަނީ އެލީޓް ޕަރޓްނަރުންނާ ގުޅިގެން ކަސްޓަމަރުންނަށް އައު ފައިދާތަކާއި ލުއިފަސޭހަ ގޮތްތައް ހޯދައިދިނުމަށެވެ.
