ތިލަމާލޭ ބްރިޖު އެޅުމުގެ މަސައްކަތްކުރާ އިންޑިއާގެ އެފްކޮންސް ކުންފުނީގެ މުވައްޒަފުން ތިބުމަށް ގުޅީފަޅުގައި ހަދާފައިވާ އެކަމޮޑޭޝަން ބްލޮކްގައި ހިނގި އަލިފާނުގެ ހާދިސާއަށް ފަހު އެތަނުގައި ދިރިއުޅެމުން އައި މުވައްޒަފަކު ފެނިފައި ނުވާ ކަމަށް ބުނެ ރިޕޯޓު ކުރުމާ ގުޅިގެން އޭނާ ހޯދުމުގެ މަސައްކަތް ފަށައިފި އެވެ.
މިދިޔަ ބުރާސްފަތި ދުވަހުގެ ރޭ އަލިފާނުގެ ހާދިސާ ހިނގި އިމާރާތަކީ އެފްކޮންސްގެ 457 މުވައްޒަފުން ދިރިއުޅެމުން ދިޔަ އިމާރާތެއް ކަމަށް އެ ކުންފުނިން ބުނެ އެވެ. އޭގެތެރެއިން ފެނިފައި ހަބަރެއް ނުވަނީ އެންމެ މީހެއްގެ ކަމަށާއި އެ ހާދިސާއަށް ފަހު އޭނާ ފެނިފައި ނުވާ ކަމުގެ ރިޕޯޓު ފުލުހުންނަށާއި އެމްއެންޑީއެފްއަށް ކޮށްފައިވާ ކަމަށް އެފްކޮންސް އިން ބުނެ އެވެ.
އެ ރިޕޯޓާ ގުޅިގެން އެމްއެންޑީއެފުން އަލިފާނުގެ ހާދިސާ ހިނގި އިމާރާތް ބަލައި ފާސްކުރުމަށް ފަހު އެ އިމާރާތުން އެއްވެސް މީހެއްގެ ހަށިގަނޑު ފެނިފައި ނުވާކަން އެ ކުންފުންޏަށް ކަށަވަރު ކޮށްދީފައިވާ ކަމަށް ވެސް އެފްކޮންސް އިން ބުންޏެވެ. ނަމަވެސް އެ އިމާރާތް ބަލައި ފާސްކޮށް އެމީހާ ހޯދުމުގެ މަސައްކަތް އަދިވެސް ކުރިއަށްދާ ކަމަށް ފުލުހުން ބުނެ އެވެ.
ގުޅީފަޅުގައި ގިނގި އަލިފާނުގެ އެ ހާދިސާގައި އެކިވަރުގެ އަނިޔާވެގެން 78 މީހަކު ހޮސްޕިޓަލްތަކަށް ގެންގޮސް ފަރުވާދީފައިވެ އެވެ. އޭގެތެރެއިން 32 މީހަކު ފަރުވާ ދިނުމަށް އެނދުމަތި ކުރެވުނުއިރު، ކުދި އަނިޔާވި 24 މީހަކަށް ފަރުވާ ދިނުމަށް ފަހު ވަނީ ދޫކޮށްލާފަ އެވެ.
މީގެ ކުރިން އެފްކޮންސްއިން އެ ހާދިސާއާ ގުޅިގެން ނެރުނު ބަޔާނެއްގައި ވަނީ އެތަނުގައި ދިރިއުޅެމުން އައި ހުރިހާ އެންމެން ސަލާމަތް ކުރެވުނު ކަމަށް ބުނެފަ އެވެ. ނަމަވެސް އަލުން އެތަނުގައި ދިރިއުޅެމުން އައި މީހުންގެ އަދަދު ބެލުމުން އެކަކު މަދުކަން ފާހަގަ ކުރެވިގެން ފުލުހުންނަށާއި ސިފައިންނަށް ރިޕޯޓު ކުރީ މިއަދު އެވެ.
އެ ހާދިސާގައި އެތަނުގައި ދިރިއުޅެމުން އައި މީހުންގެ ތަކެތި އަނދައިގެން ގޮސް، ހާލުގައި ޖެހިފައިވާ ކަމަށް ބުނެ މިއަދު ހެނދުނު ވަނީ ގުޅީފަޅުގައި ހަމަނުޖެހުން ވެސް ހިންގާފަ އެވެ. ނަމަވެސް އެފްކޮންސް އިން ވަނީ ހާލުގައި ޖެހުނު މީހުންނަށް މިހާރު ވަނީ ބޯހިޔަވަހިކަން ހަމަޖައްސައިދީ، އަންނައުނާއި، މޮބައިލް ފޯނުގެ އިތުރުން ފައިސާގެ އެހީތެރިކަން ވެސް ފޯރުކޮށްދީފަ އެވެ.
އެ ކުންފުނިން މިއަދު ހިއްސާ ކުރި ކުރު ބަޔާނެއްގައި ވަނީ އަލިފާނުގެ ހާދިސާ ހިނގި އިމާރާތުގައި އުޅެމުން އައި އެއްވެސް މުވައްޒަފަކަށް ދޭންޖެހޭ މުސާރައެއް ނުވަތަ އިނާޔަތެއް ވެސް ނޯންނާނެ ކަން ކަށަވަރު ކޮށްދީފަ އެވެ.
އެ ކުންފުނިން ބުނީ މުވައްޒަފުންގެ ސަލާމަތާއި ރައްކާތެރިކަމަކީ އެފްކޮންސް އިން އެންމެ އިސްކަމެއްދީގެން ބަލަހައްޓާ އެއް ކަންތައް ކަމަށެވެ. އަދި ކުރިއަށް އޮތް ތަނުގައި މިފަދަ ހާދިސާއެއް ނުހިނގާނެ ގޮތަކަށް ކަންކަން އިންތިޒާމު ކުރުމުގެ މަސައްކަތް އެ ކުންފުނިން މިހާރު ވެސް ކުރަމުން އަންނަ ކަމަށް އެ ކުންފުނީގެ ބަޔާނުގައިވެ އެވެ.
