ހދ. ނޮޅިވަރަމުގައި 28 އަހަރުގެ އަންހެނަކު މަރުވެފައި އޮއްވާ ފެނުމާ ގުޅިގެން ހޯދަމުންދިޔަ ފިރިހެން މީހާ ހައްޔަރުކޮށްފި އެވެ.
މަރުވެފައި އޮއްވާ ފެނުނީ ނޮޅިވަރަމު ނިޝާމާ މުހައްމަދު އެވެ. އެ މައްސަލައިގައި ހޯދަމުންދިޔައީ އޭނާގެ ފިރިމީހާ، އދ. ފެންފުށީ އަބޫބަކުރު ފައިސަލް އެވެ.
އަބޫބަކުރު ހައްޔަރުކުރިކަން ފުލުހުން ކަށަވަރުކޮށް ނުދެ އެވެ.
ނަމަވެސް ނޮޅިވަރަމުން ވާހަކަ ދެއްކި ބައެއް މީހުން ބުނީ އޭނާ ހައްޔަރުކޮށްފައިވާ ކަމަށާއި، ހައްޔަރު ކުރީ ހދ. ކުޅުދުއްފުށިން ކަމަށެވެ.
މަރުވި އަންހެން މީހާގެ އާއިލާގެ މީހަކު "އަދަދު" ނޫހަށް ބުނީ އަބޫބަކުރު ކުޅުދުއްފުއްޓަށް ދިޔައީ ކުއްލި ގޮތަކަށް ކަމަށެވެ.
"އޭނާ ކުޅުދުއްފުއްޓަށް ދިޔައީ ފެރީ ލޯންޗުގައި. ބުނީ ދަތެއްގައި ރިއްސަނީ ކަމަށް،" މި ނޫހާ ވާހަކަ ދެއްކި މީހާ ބުންޏެވެ.
މަރުވި ނިސާމާ
ނިޝާމާ މަރުވެފައި އޮތީ އޭނާ ދިރިއުޅޭ ގޭގެ ކޮޓަރީގެ އެނދުގައި ކަމަށް އެ އާއިލާއިން ވާހަކަ ދެއްކި މީހާ ބުންޏެވެ. ހަށިގަނޑުގެ ބޭރުފުށުން އަނިޔާއެއް ފެންނަން ނެތް ކަމަށް އޭނާ ބުންޏެވެ.
ނިޝާމާގެ ހަށިގަނޑު މިހާރު އޮތީ ނޮޅިވަރަމް ސިއްހީ މަރުކަޒުގަ އެވެ. މައްސަލަ ފުލުހުން އަންނަނީ ތަހުގީގުކުރަމުންނެވެ.
ނިޝާމާ އާއި އަބޫބަކުރުގެ ކުޑަކުޑަ ތިން ކުދިން ތިބެ އެވެ. އެއީ ދެ އަންހެން ކުދިންނާއި ފިރިހެން ކުއްޖެކެވެ.
