ޖާ އިންވެސްޓްމެންޓްސް އާއި އެ ކުންފުނީގެ ދަށުން ހިންގާ ޖައުސާ ކޮންސްޓްރަކްޝަންގެ ބިދޭސީ 44 މުވައްޒަަފަކަށް މުސާރަ ނުދޭތާ ގިނަ ދުވަސްވެ، އެމީހުން ހާލުގައި ޖެހުމުން މައްސަލަ ހައްލުކޮށްދިނުމަށް ރާއްޖޭގައި ހުންނަ އިންޑިއާގެ ހައި ކޮމިޝަނުން ސަރުކާރުގައި އެދެފި އެވެ.
ހާލުގައި ޖެހިގެން އުޅޭ އިންޑިއާއަށް ނިސްބަތްވާ 44 މީހުންގެ ތެރެއިން "އަދަދު" ގެ ނޫސްވެރިންނާ ވާހަކަ ދެއްކި މުވައްޒަފުން ބުނީ އެމީހުންނަށް މުސާރަ ނުދޭތާ ހަތަރު މަސް ދުވަސް ފާއިތުވެއްޖެ ކަމަށެވެ. އޭގެ ސަބަބުން، އަމިއްލަ ގައުމުގައި ތިބި އާއިލާގެ މީހުން ވެސް ހާލުގައި ޖެހިފައިވާ ކަމަށް މި ނޫހާ ވާހަކަ ދެއްކި ބިދޭސީން ބުންޏެވެ.
"އަހަރުމެން އާއިލާގެ މީހުން ވެސް ކާނެ އެއްޗެއް ނެތް. ކުޑަ ކުއްޖަކު އަހަރެންގެ އެބަހުރި. މިހާރު މުސާރަ ނުދޭތާ ހަތަރު މަސް ވީ،" ޖައުސާގެ މުވައްޒަފަކު ބުންޏެވެ.
އިންޑިއާ ހައި ކޮމިޝަނުން ފޮރިން މިނިސްޓްރީ އާއި ލޭބާ ރިލޭޝަންސް އޮތޯރިޓީ އާއި މޯލްޑިވްސް އިމިގްރޭޝަނަށް މިދިޔަ ހޯމަ ދުވަހު ފޮނުވި ސިޓީއެއްގައި ބުނެފައި އޮތީ، އެ 44 މުވައްޒަފުންގެ ޕާސްޕޯޓު ވެސް ގާނޫނާ ހިލާފަށް ކުންފުނިން އަތުލާފައިވާ ކަމަށާއި މުސާރަ ނުލިބުމުގެ ސަބަބުން އެމީހުން ހާލުގައި ޖެހިފައިވާ ކަމަށެވެ.
"ކުންފުނިން މުވައްޒަފުންނަށް ސިއްހީ ފަރުވާ އާއި ރަނގަޅު ކާނާ ވެސް ފޯރުނުކޮށްދޭ. މީގެ ކުރިން ވެސް މި ކުންފުނީގެ 19 މުވައްޒަފަކަށް މުސާރަ ނުދީގެން އެ މައްސަލަ ޖައްސާފައިވޭ. އެމީހުން އެދެނީ ނުލިބި ހުރި މުސާރަ ހޯދުމާއި އެމީހުންނަށް ލިބިފައިވާ ގެއްލުމުގެ ބަދަލު ހޯދަން،" އެ ސިޓީގައި ބުނެފައިވެ އެވެ.
އެ މައްސަލައިގައި ޖާ އިންވެސްޓްމެންޓްސްގެ ފަރާތުން މި ނޫހާ ހިއްސާ ކުރި ކުރު ބަޔާނެއްގައި ބުނީ، ބައެއް މުވައްޒަފުންނަށް މުސާރަ ދިނުން ލަސްވެފައިވާ ކަމަށާއި ނަމަވެސް އެ މައްސަލަ މި ޑިސެމްބަރު މަހުގެ ތެރޭގައި ހައްލު ކުރުމަށް މަސައްކަތް ކުރަމުންދާ ކަމަށެވެ.
"މުސާރަ ދިނުން ލަސްވެފައިވާތީ ބައެއް މުވައްޒަފުން އެކަމާމެދު ހިތްހަމަނުޖެހޭކަން މި ކުންފުންޏަށް ވަނީ އެނގިފަ. އެ މައްސަލައިގައި ކަންބޮޑުވުން ފާޅުކޮށް އެ މުވައްޒަފުން ވަނީ މަސައްކަތަށް ނިކުތުން ހުއްޓާލާފައި. މި ކުންފުނިން މިހާރު ވެސް މަސައްކަތް ކުރަމުންދަނީ އެ މައްސަލަތައް މި ޑިސެމްބަރު މަހުގެ ތެރޭގައި ހައްލު ކުރެވޭނެ ޕްލޭނެއް ހެދުމުގައި،" ޖާ އިންވެސްޓްމެންޓްސް އިން ބުންޏެވެ. "މައްސަލަ ހައްލު ކުރެވެންދެން އެމީހުންނަށް ކާބޯތަކެއްޗާއި އެކޮމަޑޭޝަން ދަނީ ދެމުން."
އެ މައްސަލައިގައި ފޮރިން މިނިސްޓްރީއާ މި ނޫހުން ސުވާލު ކުރުމުން ބުނީ ދިވެހިރާއްޖޭގައި ހުންނަ ބޭރުގެ މިޝަންތަކުން ފޮނުވާ މައްސަަލަތައް އެކަމާ ގުޅޭ އިދާރާއަކަށް ފޮނުވައި، އެ އިދާރާއަކާ މިނިސްޓްރީން ކޯޑިނޭޓު ކުރަމުންދާ ކަމަށެވެ. ނަމަވެސް ޖައުސާ މުވައްޒަފުންގެ މައްސަލައިގައި ސީދާ އެއްޗެއް ނުބުނެ އެވެ.
އެކަމާ ގުޅިގެން ލޭބާ ރިލޭޝަންސް އޮތޯރިޓީން ބުނީ އެ އިދާރާއަށް ހުށަހަޅާ މައްސަލަތަކާއި ބަލަމުންދާ މައްސަލަތަކުގެ އެއްވެސް ތަފްސީލެއް އާންމު ނުކުރާ ކަމަށެވެ.
ދިވެހިރާއްޖޭގައި ގާތްގަނޑަކަށް 230،000 ބިދޭސީން ދިރިއުޅޭ ކަމަށް ބެލެވޭއިރު އޭގެ ތެރެއިން 60،000 އަށް ވުރެ ގިނަ މީހުންނަކީ އަންޑޮކިއުމެންޓެޑް މީހުންނެވެ. އޭގެ ތެރެއިން އެންމެ ގިނައީ ބަންގްލަދޭޝްގެ މީހުންނެވެ. އެންމެ ގިނަ މީހުން ގެންނަނީ ކޮންސްޓްރަކްޝަން އިންޑަސްޓްރީގައި މަސައްކަތް ކުރުމަށެވެ.
ރާއްޖޭގައި މަސައްކަތް ކުރާ ބިދޭސީންގެ ބޮޑު ބަޔަކީ އިންސާނީވަގުފާރިއަށް ހުށަހެޅިފައިވާ ބައެއް ކަމަށް އދ. އިން ބުނެ އެވެ. އޭގެ ތެރެއިން ވަރަށް ގިނަ ބަޔަކީ ލާއިންސާނީ އަދަބުތަކާއި ހާލަތްތަކަށް ހުށަހެޅިފައިވާ ބައެއް ކަމަށް ވެސް އދ. އިން ބުނެ އެވެ. އަދި ކޮވިޑް-19 ގެ ސަބަބުން ރާއްޖޭގައި އުޅޭ ބިދޭސީންގެ ހާލަތު އިތުރަށް ދަށްވެފައިވާ ކަމަށް ވެސް އެ ޖަމިއްޔާއިން ބުނެ އެވެ.
